Leminin vanga sawn tur Ngopa CHC-a hmalak dan MLA-in a en

Lengteng bialtu MLA F Rodingliana, minister of state chuan nimin khan tun hnaia leminin a tihchhiat, Ngopa Community Health Centre (CHC) a tlawh a; leiminin a tihchhiat belh zel tur venna tur leh OPD building luah ngam loh sawn lailawk dan tur a en.

F Rodingliana chuan, geologist-te'n lei chêt dan an zir chian nghal tur thu sawiin, "Siamṭhat dan tur pawh NHIDCL leh PWD bakah, NHM Technical Wing lama mithiamte'n an ruahman thuai dawn. Leimin vanga harsatna a thlen hma daih aṭang tawhin Ngopa CHC building sak ṭhat tum a ni tawh a, sak ṭhatna tur pawisa a awm tawh," a ti.

Ngopa CHC chu hun lo kal leh zel tur thlir chungin, khum 50 tal awm tura tihlen a ṭul thu sawiin F Rodingliana chuan, a ṭul chuan damdawi-in awmna pawh sawn mai tura hmathlir thui tak nei turin khawtlang hruaitute leh official-te a chah.

Ngopa CHC medical officer Dr Lalrintluangi'n leimin vanga harsatna an tawh dan a sawi a, "Leimin vang hian OPD building leh choka luah ngam lohin a awm tawh a, damlo pawh casualty ward-ah kan en rih," a ti.

Minister hi Saitual bawrhsap Dr Lalngura Tlau, Champhai chief medical officer R Lalnienga, Power & Electricity department hotute leh Directorate of Geology & Mining mithiamnte'n an ṭawiawm a ni.