Lawngtlaiah media workshop buatsaih

Directorate of Information & Public Relations leh Mizoram Journalists' Association (MJA) bultumin Lawngtlai IPRO leh MJA, Lawngtlai District chuan nimin khan Lawngtlai Press Club-ah media workshop an buatsaih a; adviser to CM Dr Lorrain Lalpekliana Chinzah, MLA-in a hmanpui.

Dr Lorrain Lalpekliana Chinzah chuan, chanchin thar lak khawm leh thehdarh kawngah Lawngtlai district chu district dang aia hmasawn tak nia a hriat thu sawiin, ṭhahnemngai taka thawk zel turin a fuih a, "New media vangin traditional media-in harsatna tâwk ṭhin mah se, mipuite'n traditional media - an la hlut hle a, hlut tlak leh rintlak ni tura thawhrim a pawimawh," a ti.

Mizo ṭawng dik taka ziah a pawimawh thu sawiin Dr Lorrain Lalpekliana chuan, "Social media hman nasat avangin hawrawp uluk lohna a hluar hle," a ti a; hawrawp dik tak, ziah zawm leh zawm loh tur bakah, spelling dik tak hmang zel turin thuthar thehdarhtute a chah.

Media workshop-ah hian Lawngtlai MJA treasurer Lalngheta Ralte kaihhruaiin Vanneihtluanga buatsaih 'Traditional media and new media' tih zirho a ni a; Lawngtlai IPRO Zonunchama Ralte kaihhruaiin Dr H Laldinmawia buatsaih 'Mizo ṭawng ziah dan dik' tih zirho a ni.