Abacus & Mental Arithmetic inelna

ZoCareer Abacus chuan nimin khan Dawrpui Multipurpose Centre-ah 2nd State Level Abacus & Mental Arithmetic Competition an buatsaih a; South Tuipui bialtu MLA Jeje Lalpekhlua'n a hmanpui.

Abacus & Mental Arithmetic Competition-ah hian ZoCareer Abacus hnuaia centre hrang hrang pakua aṭangin zirlai 712 an tel a; chawhma lamah inelna buatsaih niin, chawhnuah zirlaite'n an thluak chak dan Abacus hmanga an entirna neih hun buatsaih a ni.

Intihsiaknaa level 1 aṭanga level 6 thlenga ti ṭha zual panga ṭheuh hnenah lawmman pek a ni. A ti ṭha zualte chu Indore-a national competition-ah an tel dawn a, a ti ṭha zingah an tel zel chuan Dubai-a international competition-ah an tel ang.

Jeje Lalpekhlua chuan, ZoCareer-in Mizo naupangte tana intihsiakna ṭha an buatsaih chu ṭha a tih thu a sawi a; nu leh pa leh zirtirtute thu awih tur te, thawhrimna nena hma lam hun hmachhawn tur te, an zirlaiah tih tak takna nunpui tur te, chhawr tlak leh hman tlak leh mi dangte malsawmna thlentu nih tum turtein zirlaite a chah. Ruihhlo laka fihlim tur leh ram leh hnam tihmingṭhatu nih tum turin a fuih bawk.