ZPM Ṭhalai President-in duhsakna a hlân

ZPM Ṭhalai president Malsawmzuala chuan nimin khan kum thar 2021 thuchah a tichhuak a; hripui léng karah kum 2020 chhunga ZPM Ṭhalaiin malsawmna tam tak an dawnah an lawm thu tarlangin, political party tin leh Mizo mipuite hlim taka kum thar hmang turin duhsakna a hlân.

Malsawmzuala chuan, "ZPM ṭhalaite chu kalphung thar cháwi nung tura thatho taka ke pên zel turin ka chah a, kum lo thar turah pawh Pathian thuin, 'He khawvêl dân ang hian awm suh ula; Pathian duh záwng, a ṭha leh lawm tlâk leh, ṭhat famkim chu in hriat fiah theih nan, in rilru a thara awmin lo danglam zawk tawh rawh u,' a tih angin, kan ram politics-ah danglamna thlentu ni turin ṭan i la lehzual ang u," a ti a; an mite chu a ram leh a felna zawng hmasa zel turin a chah.

Kum 2020 chhungin ZPM-in Pathian malsawmna an dawng nasat rualin, kawng bumbohte pawh an paltlang tih sawiin Malsawmzuala chuan, an thil tawn apiangah lawmthu sawi turin an mite a chah a, "MLA aṭanga Pu Lalduhoma paih a nih chungchangah pawh rilru na takin awm mah ila, kan Pathian hian malsawmna inthup a dah ka ring tlat a ni," a ti a; Lalduhoma duhsaktu leh lainattu, thilpek leh ṭawngṭaina hlantute chungah lawmthu a sawi.

ZPM Ṭhalai President chuan, Mizoram khai chhuak tura hmasawnna rahbi rapa chak taka ke pên tur leh mahni inhâi vûr tum loa ram leh hnam siam tum turin political party tin a ngen a; "Zoram mipui hi thuawih thei tak, taima leh huaisen tia hriat kan nih ṭhinna hian min la liamsan lo a, ram rorelna kalphung fel loin a chhilh bo rih mai a ni," tiin, party tinte leh Zoram mipuite kum thar hlim taka hmang turin duhsakna a hlàn a ni.