MLA-in MLA bàn duhna rilru a dem

MLA Lalchhuanthanga chuan, MNF Legal Board-in ZPM MLA-te MLA aṭanga bàntir duhna rilru an pu chu a dem thu sawiin, an duh anga chêt leh an tum a nih chuan amah chu bantir tur pakhatnaah dah se pawi a tih loh thu a sawi.

Nimina a bial, Aizawl South-II chhunga AMC Ward XVIII-a ZPM Campaign Committee-te hun a hmanpuinaah thu sawiin Lalchhuanthanga chuan, mipuiin duh taka MLA atana bial pahniha an thlan tlin Lalduhoma dik lo taka paih a ni chu ná a tih thu a sawi a ni.

Lalchhuanthanga chuan, "MNF Legal Board-in MLA paruk la awmte vauna ṭawngkam cheh a, disqualify zel duhna rilru pua ṭawngkam an nei kha pawi ka ti a, Kristian ram nih nen a inhmeh lo hlein ka hria. An rilru put hmang kha kan cho tihna ni loin, an duh ang ngeia chêt leh an tum a nih phawt chuan disqualify tur list number 1-ah min dah hial mahse pawi ka ti lo," a ti.

Aizawl South-II MLA chuan, kut hnathawktute chawikàn leh ṭhalaite hman tlaka chher chhuah chu an tum a ni tih sawiin, "December 21 khan ka biala kut hnathawktute chawikanna atan mistiri-te hnenah kháwl leh hmanraw dangte Krismas present atan kan lo pe tawh a, khangte kha kut hnathawktute leh ṭhalaite hman tlaka chher chhuah kawnga kan bul ṭanna chauh a ni," a ti a; hmeichhe tana eizawnna hmanrua - puanṭhui kháwl, embroidery kháwl leh hmai leh sam siamna hmanruate pek zel an tum thu a sawi.

Lalchhuanthanga chuan, AMC inthlan turah a bial chhungah sum leh therhlo hmatheha campaign an awm a hlau hle tih sawiin, "Chutiang an awm a nih chuan bial mipui zah lohnaah ka ngai ang. Kan bial hi bial zahawm tak a ni tih hre rengin MLA inthlanah pawh sum kan chelek ve lo. Kan khingpuite ka ngen duh chu, inthlanah hian sum chelek lo zawngin, zahawm taka vote dil zawk turin ka ngen a ni," a ti.