AMC inthlanah MNF kan tling dawn - MNF Vice President

MNF vice president Lalthlengliana chuan, AMC inthlan turah Congress leh ZPM-te chu engmah an ni dawn lo nia sawiin, MNF candidate-te an tling ngei dawn niin a sawi.

AMC Ward-II huam chhunga MNF aṭanga local council-a tling tharte chawimawina leh AMC campaign hawnna, nimina Bawngkawn Middle School II-a a hmanpuinaah Lalthlengliana chuan, "AMC inthlan turah Congress leh ZPM-te hi engmah an ni dawn chuang lo. ZPM hi an unit-a an ngaih kohhran ho pawhin an hmuh dan a danglam tawh. Pathian leh mipui zarah AMC inthlanah MNF candidate-te an tling leh ngei dawn a ni," a ti.

Ramin harsatna a tawh laiin Pathianin Congress party a thukru a, rorel turin MNF a pho chhuak ṭhin nia sawiin Lalthlengliana chuan, "CM Pu Zoramthanga kaihhruaina hnuaiah Mautàm ṭàmpui laiin sorkar hmasaah buhfai a thlawnin thla ruk chhung kan sem a, tunah hripui lên laiin Lalpa'n rorel turin MNF chu a ruat leh a ni," a ti a; ZPM sorkar ta se, kalphung thar ngaihtuah ringawtin hun an hman tur thu leh Congress la sorkar ta se, zu zawrh ringawt an buaipui dawn niin a sawi.

MNF Vice President chuan, hripui léng donaah Police, Health leh department hrang hrang leh kohhran leh tlawmngai pawlte ṭan rualna Pathianin mal a sàwm thu a sawi a, "Ram dangah an thih ruih ruih laiin India ramah hri kai tlemna ber leh thihpui tlemna ber ram kan ni," a ti.

Inkhawmah hian MLA C Lalmuanpuia leh AMC Ward-II MNF candidate Lalringliana te pawhin thu an sawi a ni.