KHAWTHLIR
Thisen pe
April 25, Inrinni khan Adventist Youth Federation, Aizawl chuan Aizawl Civil Hospital-ah thisen unit 55 an pe a, a petute mipa 42 leh hmeichhia 13 an ni. Mara Thytlua Py (MTP) New Colony-III Branch-in Siaha District Hospital-ah unit 22 pein, petute mipa 17 leh hmeichhia panga an ni a; Chanmari Branch KṬP pawhin Synod Hospital-ah thisen unit 19 an pe a, petute mipa 16 leh hmeichhia pathum an ni.
UPC-in ṭanpui
UPC (NEI), Aizawl East District chuan Superintendent Relief Fund aṭangin Hliappui khuaa rial tlain in a tihchhiatte ṭanpui nan Inrinni khan V/C hnenah Rs. 60,000 an pe a, Hliappui UPC Kohhran Sunday School Hall chung siamṭhat nan Rs. 20,000 an pe nghal. Tun hnaia Darlawna leiminin in a tihchhiat chhungkaw pakhat hnenah ṭanpuina an pe a; Sesawng khuaa thli tlehin in a tihchhiat an kohhran chhungkua 14 hnenah April 21 khan ṭanpuina an pe bawk.
Thlai chî sem
Mamita District Agricultural Office, District Management Unit, Mamit FOCUS-te huaihawtin April 25, Inrinni khan Mamit DAO pisa tualah farmer interest group (FIG) member-te hnenah vaimim, mai, bean, behlawi, behliang leh anṭam chîte an sem. Mamit FOCUS hotute chuan, chawlhkar tharah FIG hnuaia khaw 74-ah a thlâwna sem leh an tum thu an sawi.
Medical camp
46 Assam Rifles chuan nimin khan Mimbung khuaah free medical camp an buatsaih a, mipuite hriselna dinhmun an endik bakah, a thlawnin damdawi an sem. AR doctor-te chuan in entir tura kalte chu Covid-19 lan chhuah dan leh a inven dan an zirtir nghal a ni.
Chin mite lawm
Chin Refugee Committee, New Delhi chuan, Covid-19 léng vanga hna thawk thei loa an awm laiin, Mizoram Chief Minister's Relief Fund aṭangin chhawmdawlna sum Rs. 5,00,000 an dawn thu sawiin, lawmawm an tih thu an tarlang.
Rs. 10,90,000 zawk
Mizoram Synod moderator Rev. R Lalchangliana'n April 24, 2020-a Hliappui khuaa rial tla vanga chhiatna tawkte ṭanpuina a hlan zat Rs. 1,90,000 tia Vanglaini, April 25, Inrinnia chhuaka tarlan chu chhut sual palh a ni a, Rs. 10,90,000 hû zawk a ni.