PSU ṭha thawhpui tur zawnsak turin SYS Minister-in Union Minister a ngen

Sports & Youth Services minister Lalnghinglova Hmar chuan July 1, 2025-a Union Cabinet meeting-in National Sports Policy (NSP) 2025 a pawm tâk zûlzuiin Mizoramin public sector undertaking (PSU) rintlak a thawhpui tur zawnsak turin Union Sports Minister a ngen.

SYS minister Lalnghinglova Hmar hian nimin zing khan Union Sports & Youth Affairs minister Dr Mansukh Mandaviya chu a inah a kâwm a; NSP 2025 zûlzuiin PSU rintlak thawhpui tur zawnsak tura ngenin, “Indian football-ah Mizoramin dinhmun sang a luah mek a, Indian Super League leh I League season hnuhnung berah state angin Mizoram player-te'n an khel tam ber. Kan thlen chin aṭanga hmasawn zel turin ruhrel ṭha kan neih belh a ngai a, state dang nen khaikhina zahpuiawm lo tur football stadium kan mamawh," a ti.

Dr Mansukh Mandaviya chuan, football-a Mizoram hmasawnna chu a hriat thu sawiin, NSP tharin India rama infiamnaah a ṭha zawnga danglamna a thlen a beisei thu a sawi a; Mizoramah football stadium mai ni lo, infiamna ruhrel hmasawn nan thawhpui tur PSU thlan thuai a nih tur thu leh, PSU hotute nena an ṭhutkhawm hunah Mizoram Sports Minister chu a koh tel ngei tur thu a sawi bawk.

Sorkar thuchhuah tarlan danin, Mizorama infiamna ruhrel hmasawn nan Khelo India hnuaiah Multidisciplinary Indoor Stadium sakna tur cheng vbc 11.5 te, NESIDS-OTRI hnuaiah indoor stadium pathum sakna tur cheng vbc 38.4 te, PMJVK hnuaiah Hnahthiala synthetic hockey turf phahna tur cheng vbc 9.88 te, Thenzawl khelmuala football phûllem phahna tur cheng vbc 11.85 leh, Champhaia phûllem phahna tur cheng vbc 12.01 te chu tun hnaiah pawm a ni.