Tennis Court bul kawng kama inzuar ṭhinte harsatna ngaihtuahtu tur din

Urban Development & Poverty Alleviation (UDPA) minister K Sapdanga hoa a pisaa nimina sorkar hotute leh khawtlang hruaitute ṭhukhawm chuan, Aizawl Tennis Court bul kawng kama chawhmeh zuar ṭhinte ṭhutna tur hmun rem zawk ngaihtuah turin Working Committee an din.

Ṭhutkhawmah hian Aizawl Tennis Court leh a chhehvel kawngpui kama chawmhmeh zuar ṭhinte harsatna chingfel tur leh an ṭhutna tur hmun dang ngaihtuah turin Working Committee din an rêl a; convener-ah AMC commissioner ruat niin, Aizawl DC, SP leh Traffic SP-te chu member atan ruat an ni.

Working Committee hian Tennis Court bula ṭhute bakah, Aizawl veng hrang hranga kawngpui kama chawhmeh zuara ṭhu ṭhinte chu traffic tibuai lo leh felfai zawka an ṭhut theihna tur hmun an ngaihtuah dawn a ni.

Ṭhutkhawmah hian AMC-in veng hrang hranga bazar a sakte luah khah loha an awm mek thu tarlan a ni a; Aizawla kawngpui kam leh kea kalna tur (footpath)-a chawhmeh zuar ṭhinte'n lirthei chet velna a tihbuai bakah, mihring kalna tur a dâl ṭhin thu te, kawngpui a chêp phah avangin lirthei khalhtu te, kawng sira ṭhute leh kea kalte tan a him loh thute tarlan a ni bawk.

Meeting-ah hian Aizawl mayor Lalrinenga Sailo leh deputy mayor R Thanglura, Commerce & Industries secretary Dr Lalzirmawia Chhangte, UDPA secretary Lalmalsawma Pachuau, Information & Public Relations secretary Betsy Zothanpari Sailo, Aizawl bawrhsap Lalhriatpuia, Aizawl SP Rex Zarzoliana Vanchhawng, AMC commissioner Joseph H Lalramsanga, Traffic SP Ruatsanga Ralte, Khatla leh Tuikhuahtlang local council aiawhte an tel a ni.