NH kawng siam hnatlang tihtawp a ni; Hnatlan ngai tawh lo tura siam an phût

Mizoram Tipper Assciation (MTA) District Headquarters, Kolasib chuan June 26, 2025 aṭanga Kawnpui leh Sairang inkar NH-306 & 06 lamlian siam hnatlang an koh chu July 1, Thawhlehni zan dar 8 khan an titawp a; he kawngah hian lirthei eng chi pawh tlan leh theih a ni tawh.

MTA chuan thuchhuah siamin, hlawhtling takin an hnatlang niin an tarlang a, "Helai kawng kan châk lakna pui ber hi lirthei bungraw phura tlante tan a him loin, motor tam tak a tlu tawh a, motor tam takin a chhiat phah. Thuneitu lamin a tihngaihna ngang an hriat tak loh avangin lirtheia eizawng pawlte chuan hnatlangpui kan ko ta a ni," an ti.

Hnatlanna atana thâ leh zung, sum leh pai leh lirthei thawh chhuahpuitu te, MTA Gen. Hqrs, All Mizoram Commercial Tipper Association, Kolasib Sub-Hqrs. YMA, Awithangpa Group YMA, Khamrang mipui, Kawnpui Town Driver Association leh pawl hrang hrang leh mimal sum leh paia thlawpna ṭha tak an dawn avangin an lawm thu MTA chuan an sawi.

MTA chuan, June 30 khan PWD Minister an hmu tih tarlangin, "Thu lawmawm tak hmuh tur erawh a awm lem lo. Chutih rualin, lung trip 40 an rawn thawh ve tur thu a sawi erawh lawmawm kan ti. Heng lungte hi a rang thei ang bera kawng hnawh nana rawn hmang tur leh, hnatlan leh ngai kher loa a ṭul anga bawhzui turin kan phût," an ti.

Hnatlan chhungin mipui tawrhna nasa zawk a thlen an hlau hle tih tarlangin MTA chuan, "June 28 zan dar 8 aṭanga a tuk zan dar 8 khan lirthei tangkhang, a ruaka chhuk thla lamte chhuah phawt an ni," an ti a; June 30 zan dar 12 khan eirawngbawlna gas phur leh oil tanker-te chhuah leh an nih thu an tarlang.

Kolasib MTA chuan, khuain min bumro avang leh duh anga hmanrua a awm tam theih loh avangin duhthusamin kawng hnawh an tum pawh an ti thei ta lo tih sawi a, "July 1 zan dar 8 khan hnathlangpui tihtawp a ni. Hnatlangpui kan neih chhunga Zoram mipuite'n min thlawp tlat avangin lawmthu kan sawi e," an ti.