KHAWTHLIR

Thisen pe

Apostolic Theological Institute, Durtlang chuan nimin khan thisen pek an huaihawt a, mipa 27 leh hmeichhia pakhatin Synod Hospital tan thisen unit 28 an pe.

Rev. Lalnghinglova

Rev. Lalnghinglova (99), Mission Vengthlang chu nimin chawhma dar 10:10 khan City Hospital, Mission Vengah a thi a, vawiinah vui a ni ang. Rev. Lalnghinglova hi March 25, 1926-ah a piang a, kum 1956-ah pastor atan nemngheh a ni a, hun rei tak chhung chu Mizoram Synod hnuaia pastor/minister la dam zinga senior ber leh upa ber a ni reng ṭhin. Amah hi Vanglaini columnist Lalhruaitluanga Ralte pa a ni.

Meth man

Assam Rifles leh Mizoram Police te chuan June 29, 2025 zan dar 9 vel khan Zokhawtharah Myanmar mi pakhat hnen aṭangin Methamphetamine kg. 2.226 (mûm 20,200 vel) an man a, Zokhawthar Police Station-ah thubuai ziah luh a ni.

SCC tlawh kual

Bána Kaih (Handholding) hnuaia sawhthing lei leh hralh khâr a nih tâk avangin Mamit bawrhsap K Laltlawmlova chuan July 1, Thawhṭanni khan Reiek, Kanghmun leh Rawpuichhipa secondary collection centre (SCC)-te a tlawh. SCC enkawltute chu mumal taka sawhthing lei leh hralh a nih theih nana an hnathawhah lawmthu a hrilh a, sawhthing lei sa tihral leh enkawlnaah theihtawp chhuah zel turin a chah.

HIV/AIDS quiz

Khawzawl District AIDS Prevention & Control Committee chuan, zirlaite'n HIV/AIDS hlauhawmzia an hriata inven dan an thiam theih nan August 18-20, 2025 chhungin Khawzawl district-a pawl 8, 9 leh 11 zirlaite tan 'Red Ribbon School Quiz Competition' buatsaih an rêl. Committee hi nimin khan an chairman K Vanlalṭhiana, bawrhsap hoin an ṭhukhawm a, September 3, 2025-ah District Level Quiz Competition buatsaih an rêl bawk a ni.

Saturation campaign

Kolasib District Rural Development Office project director Lalmuanpuia chuan July 1, Thawhṭanni zan khan Kolasib Diakkawn YMA Committee Room-ah Financial Inclusion Saturation Campaign a hawng. Ministry of Finance hnuaia Department of Financial Services chuan kumin July 1 - September 30 chhungin India rama gram panchayat (village council) tinah campaign nei turin bank-te a hriattir a, Kolasib district-a VC 56-ah pawh campaign buatsaih a ni ang.

Sawhthing lei khârna hun hmang

Champhai District Agricultural Marketing Committee chairman Moham-mad Aaquib, bawrhsap hoin nimin khan Bána Kaih scheme hnuaia Champhai district-a sawhthing lei khârna hun hman a ni. Bawrhsap chuan, "Champhai district hi district zinga ti ṭha ber pawl kan ni a, a lawmawm tak zet. Nakin zel atan thawhhona ṭha tak siamtu a nih ka beisei," a ti.

Kawng khâr dawn

Hnahthial district-a Nauhruaikawn aṭanga National Highway-54 inkar kawngah kawng bal tur vên nan lungrem hna thawh mek a ni a; hei vang hian helai kawng hi July 12, 2025 thleng khâr a ni dawn.

Human resource zirho

State Agricultural Mangement and Extention Training Institute leh Mamit District Agriculture Office chuan nimin khan Mamita IPR conference hall-ah 'Human Resources Development' tih thupui zirhona an buatsaih. Mamit district-a AH&Vety, Horticulture, Sericulture, Soil & Water Conservation leh Agriculture deparment bakah, ATMA leh GreenAg aiawhte an tel a ni.