ZPM Legislature Party-te'n Chakma-te lakah FIR thehlut

ZPM Legislature Party (ZLP) chuan, Chakma-te'n dâwt hmangin Mizote tihmingchhiat tumin Facebook-ah thu an thehdarh nia an ngaih avangin February 25, Inrinni khan Aizawl Police Station-ah first information report (FIR) an thehlut.

ZLP chuan FIR an thehluhah hian West Kawnpuia IR police pahnihte Chakma-te'n damdawi-ina dah ngai khawpa kut an thlak chungchang leh a hnua West Kawnpuia luah loh in ruak pakhat kâng chungchanga Chakma-te'n Facebook-a thu an thehdarh chu chhui chiang a, a titute man chhuak turin an ngen a ni.

ZLP tarlan danin, in luah loh pakhat kâng chu YMA leh MZP-te hâl angin Facebook-ah Chakma-te'n an thehdarh a; group pathum - Sakya Clan, World Chakma News No. 1 leh Chakma Media tihahte an thehdarh a ni.

Chakma-te thil tih dan chu Mizote khawvel mithmuhah tihmualpho tumna leh hnam inkara buaina chawk chhuak thei thilah ZLP chuan an ngai a; FIR hi ZLP secretary Dr Vanlalthlana hmingin an thehlut.

ZPM chuan thuchhuah siamin, West Kawnpuia in kâng chu Chakma-te'n Mizote khawvel mithmuha tihmualpho an tumnaah ngai a, chhui chiang tura TBC Lalvenchhunga'n FIR a thehlut chu lawmawm an tih thu an tarlang bawk.