Bána Kaih hnuaiah mi 68 hnenah Bank-te'n loan an pe chhuak tawh

Sorkar flagship programme Bána Kaih (Handholding) scheme hnuaia sorkar thawhpui (progress partner) atana thlan mi 613 zinga 68 hnenah bank-te'n loan pek a ni tawh.

Mizoram State Policy Coordination Committee (MSPCC) vice chairman Dr KC Lalmalsawmzauva kaihhruaiin nimin khan Bána Kaih scheme hnuaia hmalaknate thlirho a ni a; scheme-a sorkarin a thawhpui bank - State Bank of India (SBI), Mizoram Rural Bank (MRB) leh Mizoram Cooperative Apex Bank (MCAB)-te chuan progress partner-te loan dilna an dawn zinga mi 68 hnenah loan an pek tawh thu an sawi.

Dr KC Lalmalsawmzauva chuan, Chief Minister’s Special Package pek chhuah chungchangah district tin DC-te chu ṭanpuina dawng tura thlante tan July thla chhungin orientation training buatsaih turin a chah.

CM's Special Package phase-I hnuaia loan support dawng thei tur progress partner thlan tharte tana orientation training buatsaihna pawh DC-te hriattir an nih tur thu a sawi a; department-te chu phase-I hnuaia loan dilna under assessment-te July thla chhunga tifel vek turin MSPCC Vice Chairman chuan a chah bawk.

Ṭhutkhawmah hian district tin DC, implementing department leh sorkart thawhpui bank-te harsatna tawh leh zawhna an neih te, Bána Kaih phase-II atana inbuatsaih lâwkna chungchangte sawiho a ni.