Mizoramah ESI damdawi-in dinsak tum

Labour, Employment, Skill Development and Entrepreneurship (LESDE) minister Lalnghinglova Hmar chuan nimin zing khan Union Labour & Employment minister Dr Mansukh Mandaviya chu a inah a kâwm. Union Minister chuan, Mizoramah Employees’ State Insurance (ESI) damdawi-in dinsak ngei a tum thu a lo hrilh.

Lalnghinglova Hmar chuan, Mizoramin ESI scheme hnuaiah damdawi-in a mamawh thu sawiin, "ESI scheme hnuaia khum 30 awmna damdawi-in sa turin mi 15,000 tal inziah luh a ngai a, hei hi state tê leh mihring tlem, industry lian awm lohna Mizoram tan tlin a harsa a, tun dinhmunah phâk mai a harsa rih a, ngaihhnathiam rih kan ngai," a ti.

LESDE Minister chuan, Mizorama sumdawnna hmunahte ESI scheme chungchang inhrilhfiahna leh inziah luh rûnpui kalpui a nih thu te, tunah zirna-in hrang hrangah inzirtirna kalpui mek a nih thu te a sawi a; inziak lut an awm belh ve zel chungin, ESI damdawi-in din tura inziah luh ngai zat mi 15,000 chu tun dinhmunah phâk mai a harsat rih thu a sawi a ni.

Dr Mansukh Manda-viya chuan, ngenna chu a ngaih pawimawh thu sawiin, Mizorama ESI damdawi-in sak chu tihsak ngei a tum tur thu Lalnghinglova Hmar a hrilh.