Sorkarin Kolasib district-ah sawhthing qtl 3,882.975 a lei

Kolasib District Agriculture Marketing Committee (DAMC) kaihhruaiin July 1, Thawhṭanni khan Thingdawl Secondary Collection Centre (SCC)-ah Bána Kaih (Handholding) scheme hnuaia sawhthing lak khawm leh hralh khârna hun hman a ni. February 20 - June 30, 2025 chhungin Kolasib district-ah society 55 kaltlangin sorkarin sawhthing quintal 3,882.975 a lei.

Inkhawma tarlan danin, Kolasib DAMC hnuaiah society 55 leh SCC panga a awm a; February 20, 2025 khan DAMC hmalaknain Bána Kaih hnuaiah sawhthing lei ṭan a ni a, June 30 thlengin Mizoram sorkarin Kolasib DAMC kaltlangin sawhthing qtl. 3,882.975 a lei. Sawhthnig lei zawng zawng chu cheng nuai 194 chuang man a ni.

Kolasib additional DC B Malsawmtluangi chuan, Mizoram sorkarin Bána Kaih a kalpui chu mipui leh ram hmasawnna tur a nih thu a sawi a, "Sorkar hnuaia scheme awmte'n an tum ber chu mipui intodelhna ngaihtuah a ni a, sorkar scheme hlawhtlinna pawh mipuiteah thui tak a innghat. Mi tinin mahni intodelhna kawngah taimak chhuaha hma kan lak chuan ram hausa leh intodelh kan siam thei a ni," a ti.