Insual rawn chingte tihtawp a ngai - CM

Chief minister Lalduhoma chuan, Aizawl khawpui a ralmuan theih nan tunlaia khawlaia insual rawn chingte chu tihtawp hmiah a ngaih thu a sawi.

CM Lalduhoma hian nimina a pisaah Aizawl City Local Council Association (ACLCA) hruaitute'n an kawmnaah Aizawl chu hmun ralmuanga siam a ṭul thu a sawi a, "Tleirawl rual, mi dang sual rawn chingte an awm niin a hriat a, heng mite hi tihtawp hmiah a ngai," a ti.

Chief Minister chuan, "Kan khawlai hi zu rui emaw, buaina siam chingte emaw lakah fihlim se, nunau leh hmeichhe tan pawha hmun ralmuang taka kan siam a ngai a ni," a ti a; local council tinte chu an huam chhung ṭheuhah tlawmngai pawlte nen ṭang tlanga khawtlang ralmuanna atana hma lo la turin a ngen.

ILP chungchangah Lalduhoma chuan, "Dan lekkawh kawngah LC-te ṭanpuina kan mamawh a, no objection certificate pek kawngah pawh lo fimkhur leh zual ang che u," a ti.

ACLCA hruaitute chuan Chief Minister hnenah hian LC member-te lawmman tihsan chungchang leh Aizawla an pisa hmun ve tur chungchang an thlen. An dilnate chu a lo zir chiansak tur thu Chief Minister chuan a sawi.

ACLCA hian Chief Minister's Relief Fund-ah Rs 10,000 an chhung lut nghal a ni.