Mizoram sorkarin pisa kái tur a titlêm

Mizoram sorkar chuan sorkar pisa kai tur chin a siam tawh chu tidanglamin, pisa kai tur a titlêm a, group A-te chu pisa kai vek tura tih an nih laiin, group B, C leh D-te chu an inkal chhâwk ang. 

Pisa kai turte tih loh chu sorkar hnathawk pawh ni se, an chhuahvah phal a ni lo.

A hma chuan, group A leh B-te an kal vek a, group C leh D-te an inkal chhâwk a ni.

Sorkar pisa kai tur chin tihtlem hi khawlaia mihring leh lirthei veivâk tihtlemna atan leh hna thawhna hmun (pisa, etc.)-a in­hnaih lutuk loa awm (social distancing) a nih nan leh pisa tihthawl­na atana tih a nih thu Mizo­ram sorkar thuchhuah chuan a tarlang.

Sorkar thuchhuah tarlan danin, sorkar pisa kai dan tharah chuan - Health department, Police, Home Guards & Civil Defence, Fire & Emergency Services, Disaster Management & Rehabilitation, Civil Aviation, Prisons, Excise & Narcotics, municipal service, forest field work, PHE leh Power & Electricity department-a thawkte chu pisa kai vek tura tih an ni.

Sorkar department leh pisa dang zawngte erawh chu group B, C leh D-te inkal chhâwk tura tih an ni a, ni khatah hmun thuma ṭhena hmun khat zelin an inkal chhawk ang a; secretary, head of department leh head of office-te'n office inkai chhâwk dan tur ruahmanna siamin, vawiin aṭanga hman nghal turin order an tichhuak ang.

Pisa kai turte'n office order copy (detailment order) leh an identity card chu veivah phalna (movement permit) atan an hmang thei ang a, a ṭul huna police leh task force duty-te en turin an kawl reng tur a ni. 

Sorkar department leh office-a hotu lute chuan ṭul bik thilah chuan order dang chhuahin, group B, C leh D-te chu hmun thuma ṭhena hmun khat aia tam pisa kai turin an ti thei. 

Sorkar hnathawkte chu pisa an kai loh ní-ah phone an off tur a ni lo a, biak theihin an awm reng tur a ni a, inah office hna ṭul thawk turin an inring reng tur a ni bawk.