Opp. Leader leh Principal AG inkâwm

Mizoram Legislative Assembly-a opposition leader Lalchhandama Ralte, Assembly Public Accounts Committee (PAC) chairman ni bawk leh Mizorama principal accountant general Samar Kant Thakur chu nimin khan Leader of Opposition pisaah an inkâwm.

Lalchhandama Ralte chuan, Mizoram PAC-in theihtawp chhuaha hna an thawh thu sawiin, tun hnaiah pawh Mizoram khawchhak lam leh chhim lamah site visit neia an chhuah thu a sawi.

Principal AG chuan, PAC tel loin Mizoram AG office-in hna an thawk thei lo a, an hna pui ber chu PAC hnathawh report pek a nih thu a sawi. Rawtna sawiin, Mizoram PAC chu Central PAC kalphung anga kal ve tura a duh thu leh, a ṭul a nih chuan workshop/seminar buatsaih tura a inpeih reng thu a hrilh.

Samar Kant Thakur chuan, PAC pawimawhna sawiin, "Sorkar department leh ministry-te excess expenditure chu PAC chauhin a regularise thei a, a kalphung muang deuh mah se, PAC hnathawhin awmzia a nei hle a ni," a ti.