Ei leh bara harsatna kan tawh loh nan Nasa lehzuala inpuahchah a ṭul - Zodintluanga

Congress Legislature Party (CLP) leader Zodintluanga, MPCC treasurer ni bawk chuan, Covid-19 vanga ei leh bara harsatna Mizoramin a tawh lohna turin mipuite nasa lehzuala an inpuahchah a ṭul thu a sawi.

Zodintluanga hian tun hnaia a bial chhung khaw hrang hrang a tlawhnaah nasa lehzuala inpuahchah turin mipui a chah a, "Hripui léng mekin India ram nasa taka a tihbuai a, nakkum lamah nasa lehzuala ṭàm a tlak mai a hlauhawm avangin Mizoram mipuite chu tunah hian mahni lo inpuahchah a ngai. Buh leh thlai thar tam tura hma la turin a la tlai lo. Inpui tur bik kan awm lo palh thei a, thlawhhmá pawh kum dang aia kan ṭan a ngai," a ti.

Covid-19 vanga tawrhna a la tàwp mai dawn loa a lan thu sawiin Zodintluanga chuan, "Nakkum lam khi kan thlir a ngai a, tunah hian lo lamah nasa takin hna thawkin kan feh chhuah a ngai. Tunah hian chul rih nan a la tlai lutuk lo a, chulte pawh a thei theiin i rît ang u," a ti a; buh leh thlai thar theihna ram nei ṭha zawk thingtlang lama chengte chu kang hreng turin a fuih.

CLP Leader chuan, thingtlang lama chengte'n hripui laka himna tura hma an lakna chu fakawm a tih thu sawiin, "Hripui laka in himna atana in hmalakna a fakawm hle. Khaw tinin khaw daiah gate in siam a, in véng a, hetianga in tih zel chuan hripui lakah hian in him zel ang. Chutih rualin, hna thawk thei tawh phawt chu ram lama intirh liam hun a ni," a ti.

Bangladesh lamah Covid-19 kai an tam zel avangin Bangladesh leh Mizoram ramri ngawrh zawka vèn a ngaih thu leh Thorang bial khaw ṭhenkhat Mauzam, Terabonia, Marpara South leh New Sachan-te chu Bangladesh ramria awm a nih avangin venhimna nasa zawka kalpui a ṭul thu sawiin Zodin­tluanga chuan, "BSF mi 42 vel awm mah se, tualchhung mite hian kan thuam chak a ngai. Mizoram lama rawn tlanchhiat hi an tum nasa dawn tih a lang," a ti a, ramri chungchang chu Lunglei DC sawipui a tum thu a sawi.

Zodintluanga hian a bial chhung khaw hrang hranga task force-te hnenah pawisa, hmai tuamna, kutkawr leh damdawite a pe a; a biala khaw 36 tan buhfai ip 370 a thawn tawh bawk.