CS hoin bungraw phurh dan sawiho

Chief secretary Lalnunmawia Chuaungo hoin Mizoram district hrang hranga bawrhsapte'n April 25, Inrinni khan video conference an nei a, state leh district ramri pêla mipui ni tin mamawh (essential commodity) leh bungraw dang (non-essential commodity) ṭhenkhat phurh chungchang leh thil pawimawh dangte an sawiho.

Chief Secretary chuan, Co­vid-19 darh zel lohna tura sorkar leh mipui ṭan rualna fakawm a tih thu sawiin, "Ramri-ah dan loa lo lut turte vêng turin local task force-te chhun zan zawmin an duty a, a bik takin YMA, YLA leh MTP-ten an thawh hlâwk hle a ni," a ti.

Lalnunmawia Chuaungo chuan, Covid-19 mobile application-ah mPASS telh belh a nih thu sawiin, "Bungrua rawn phur luttute'n an bungraw phurh chu khawi aṭanga lak nge a nih a, an pekna hmun leh tu hnenah nge an pek tih bakah, address kimchang leh contact number-te mPASS hmangin chhinchhiah vek a ni," a ti a; bungraw phur lirthei khalhtute'n Covid-19 an kai palha contact tracing leh a ṭul anga hmalak nan a pawimawh dawn thu a sawi.

Lalnunmawia chuan, mPASS chu district danga bungraw phurtute'n awlái taka phalna an lâk theihna tura duan a nih thu a sawi a; lockdown chhunga inkaihhruaina dan siamah bungraw châwk luh leh thiar dan siamṭhat a nih thu sawiin, “Mizoram chhunga bungrua awm sa hmun danga phurh sawn dawnin, bungraw phurh turte awmna hmun DC-ah phalna lak tur a ni ang, tih dah belh a ni. Distict danga bung­raw phur tur chuan an awmna district bawrhsap hnenah mPASS hmangin bungraw phurh phalna an dil ngei a ngai tawh dawn," a ti.

Chief Secretary chuan, district bawrhsapte chu an bialah Telecom service mumal tak a awm reng theih nan uluk taka en zui a, a ṭul anga hma la turin a chah bawk.