2019-20 ah thisen unit 30,499 pek a ni Voluntary blood donation 90.91% a tling

Sorkar kum liam ta, April 2019 - March 2020 chhung khan Mizoram pumah thisen unit 30,499 pek a ni a, Mizorama kum khat chhunga thisen pek zat unit sing thum a tlin vawi khatna a ni. Pek bik awm loa a thlàwna pek (voluntary donation) zat chu 90.91% a tling.

Mizorama blood bank 11-te'n Mizoram State AIDS Control Society (MSACS)-a thisen pek zat report an pek khawma a lan danin, financial year 2019-20 chhunga Mizorama thisen pek zawng zawng unit 30,499 zinga 27,727 (90.91%) chu voluntary donation a ni a; blood donation camp ṭum 494 neih niin, camp bikah thisen unit 20,497 pek a ni.

Blood bank 11 zinga model blood bank awm­chhun Aizawl Civil Hospital (ACH) Blood Bank-ah thisen pek tam berin, unit 16,047 pek a ni a, chu'ng zinga unit 15,304 (95.37%) chu a thlàwna pek niin, voluntary donation sanna ber a ni bawk.

Mizorama thisen pek zat hi kum tin a pung a, 2019-20 chhunga thisen pek zat pawh hi kum khat chhunga pek tam ber a nih bakah, unit sing thum pek tlin vawi khatna a ni a, kum 2018-19 chhunga pek zat unit 27,079 aiin 3,420-in a tam zawk. Kum 2018-19 chhunga pek zawng zawng 27,079 zinga 23,434 (86.54%) chu voluntary donation niin, donation camp ṭum 458 huaihawt aṭangin thisen unit 18,653 lak a ni.

Association for Volun­tary Blood Donation (AVBD) chuan kum 2019-20 chhunga voluntary blood donation target an siam chu 90% a ni a, hei hi 0.91%-in khûm a ni.