Sorkar thutluknaah Bairabi an lawm lo

Bairabi North Village Level Task Force Committee secretary (Info. & Publicity) Laldinsanga chuan, state páwn aṭanga Bairabi kaltlanga bungraw phur lirthei lutte tikhawmuang loa kaltlangtir zel tura Mizoram sorkarin a ti chuan an rilru a tihnat thu a tarlang. Hemi chungchang hi Inrinni khan an ngaihtuah a, thutlukna an siam theih loh avangin vawiinah ngaihtuah nawn leh an tum.

Task Force Committee Secretary (Info. & Publicity) tarlan danin, Bairabi mai bakah, Mizoram chhung a him theih nan Mizoram chhunga lut tur lirtheite chu April 21 aṭang khan ni hnih tal ramri hrûl/khaw daiah an dintir ṭhin. Hei hi an fimkhur vang a ni a, ni hnih an dintir avangin Mizoram mipuite'n an nghei phah lo turah an ngai a ni.

Hetih lai hian, Mizoram sorkar chuan Kolasib District Task Force kaltlangin state páwn aṭanga rawn lut essential commodity phurte chu tlangtir zel turin a ti a ni.

Sorkar thuchhuak chungchang hi Bairabi Joint  Village Task Force chuan April 25, Inrinni zan dar 7:30-ah emergency meeting neiin an ngaihtuah a, sorkar duh dan chu a him tâwk lo theia an ngaih avangin an hrethiam lo a, "State páwn aṭanga lo lut bungrua rawn châwk luhna aṭang hian Zoram mipuiin vei lo awm palh ta ila, dem hlawh tur chu keini ramri hrûla awmte hi kan ni ngei awm si a, kan inthiam thei ngai lo ang," an ti.