Inkharkhip kaihhruaina ṭhenkhat tidanglam

Mizoram sorkar chuan inkharkhip kaihhruaina dan tur a lo siam tawh ṭhenkhat chu a tidanglam a, ruahmanna thar ang hian inkharkhipna kalpui chhunzawm zel tur a ni.

'Ni tin mamawh (essential commodity) ni lo, ei leh bar zawnna leh hmasawnna atana mamawh bungrua - steel, cement, brick, balu, insakna bungrua ilo - la lut turte chuan hemi atana dilna form siam hmangin Home department phalna an la hmasa tur a ni,' tihah, 'Mizoram chhunga bungrua awm sa hmun danga phurh sawn dawnin bungraw phur turte awmna hmun DC-ah phalna lak tur a ni,' tih belh a ni.

'Bank, insurance, ATM leh postal service, blood donation camp/ service' leh 'Power & electricity, water supply (mimal tui chawite huamin), sanitation & solid waste management (hmunphiat leh bawlhhlawh paihte huamin), telecommunication, internet service, broadcasting leh cable service' tih chu - 'Bank, non-banking financial institution (housing finance company tiamin), micro finance institution (NBFI leh MFI-te hi staff tlem thei ang ber nen an kal ang), cooperative credit so­ciety (CCS), insurance, ATM, postal service leh blood donation camp' tia thlak a ni.

Power & electricity, water supply (mimal tui chawite huamin), sanitation & solid waste management (hmunphiat leh bawlhhlawh paihte huamin), ni tin mamawh kudam, LPG bottling plant leh a kaihhnawih te, telecommunication, internet service, broadcasting leh cable service-te an che chhuak thei.

'Data leh call centre' tihah common service centre (CSC) leh prepaid mobile recharge-na hmunte belh a ni.

'Hmalakna dang chungchang' tihin 'Tui pek/sem, faina kawnga hmalakna/sanitation hna, electric ban leh line thar bun/thlun leh telecom optical fiber line phûmte a huam.

Hengte hi belh a ni: (i) Thing­tlang lam mite feh leh ramhnuaia chaw­hmeh zawn leh thing tuah (minor forest produce) fawm/zawn. (ii) Mau/rua, kuhva rah, hmarcha, sawhthing leh bàwlhlo (spices) lama hmalakna hrang hrang phun/chìn, seng, sawngbawl leh hralh.