MZU UG gold medalist-te chawimawi; 'Hnam dangin an phâkte Mizo thluakin a pha' - Lok Sabha MP

MZP Gen. Hqrs chuan nimin khan IPR Auditorium-ah Mizoram University Under Graduate Examination 2025-a gold medalist Mizote chawimawina an buatsaih a, Lok Sabha MP Richard Vanlalhmangaiha'n a hmanpui. MP chuan, hnam dang thluakin a phâk chu Mizo thluak pawhin a phâk thu sawiin, central service lama insáwrbing turin zirlaite a chah.

MZP-in MZU UG gold medalist an chawimawite chu - Arts-ah Lalremsiama, Pachhunga University College (Political science), Commerce-ah R Lalngaihawmi, HATIM, Home Science-ah Mary Lalawmpuii, Zirtiri Resi-dential Science College leh Computer Application-ah Lalruatfela Chhakchhuak Zirtiri RSC te an ni.

Richard Vanlalhma-ngaiha chuan, central service-ah Mizoram mi an tlem tawh avangin zirlaite chu ṭan la turin a fuih a, "Kum khat vel MP ka ni ve tawh a, rualawh a na khawp mai. Central hnuaiah Mizo thawk an tlem em em a, ṭhangtharte'n ṭan kan lak a ngai hle. Manipur lama kan unaute zirna lamah an kal na em em a, hmun hrang hrangah Zo hnahthlak unau central officer an rawn kal nawlh nawlh ṭhin. Parliament-ah pawh Manipur lama kan unaute an kat nuk mai," a ti.

Central/all India service lama inziak tling turin Mizo ṭhalaite'n ṭan an lak a ngaih thu sawiin Lok Sabha MP chuan, "He lamah hian in rilru lian se, insáwrbing ula ka duh. Hnam dang thluakin a phak hi Mizo thluakin a phâk vek a, Pathianin an thluak a siam ṭha bik lo tih hria ang u. An taimak anga kan taimak phawt chuan an ban phâk ang chu kan ban pha ve vek a ni," a ti a; central/all India service-a luh tum puih ngaite tan a inhawn reng thu a sawi.

Richard Vanlalhma-ngaiha chuan, zirlai chawi-mawite chu a lawmpui thu sawiin, rilru thianghlim tak leh Pathian hre reng chunga theihawp chhuah turin a chah a, "Pathianin talent min pek hai chhuak tur chuan kan taimak a ngai a, hnam dangte hi an thawk rim em em tih hria ang u. Officer kan ni vek thei lo ang, mahse, keimahni kan inhriat chian a, kan eizawnna tur kawng kan thlan thiam phawt chuan eizawnna ṭha tak kan nei zel dawn a ni," a ti.

Zirlai chawimawina inkhawm hi MZP vice president Dr C Lalrem-ruata'n a kaihruai a; Aizawl bawrhsap Lalhriatpuia leh MZP president H Lalthianghlima te pawhin thu an sawi a ni.