Police hmalakna duhkhawp loh vangin Champhai PS kawtah mipui pungkhawm

May 29, 2025 zana thi Pausianmuanga (28), Champhai Bethel Veng tualthihnaa Champhai Police hmalak dan duhkhawp loin Champhai Bethel Veng mipui leh zirlaite nimin khan Champhai Police Station kawtah an pungkhawm.

Mipuite chuan, PS Muanga tualthihna chhuitu case Investigating Officer (IO)-in a chhuina report (chargesheet) hun tiam chhunga a thehluh theih loh avangin, tualthahnaa inhnamhnawiha puhte chu court-in bail-a chhuah a phalsak niin an ngai a; Champhai PS tualah an pungkhawm a ni.

Bethel Veng khawtlang chuan, hun tiam chhung (ni 90) a ral hnu pawha court-a chargesheet thehluh a la ni lo chu an veng mipui zah lohnaa an ngaih thu an sawi a, "Ni 97 chhungin case IO hian eng nge a tih? tih hi kan zawhna a ni," an ti.

PS Muanga thihna chhuitu case IO-in chargesheet a thehluh hun tura bituk chu June 29, 2025 a ni a ni. Mahse, IO hian chhui tur a la neih avangin June 19 khan court-ah chargesheet thehluh hun pawhsei a dil a, court-in thla khat chhung hun a pek belh.

Tarlan tawh angin, PS Muanga hi March 29, 2025 zan khan Champhai Chhangphut Field gallery aṭangin a thlang lamah a tla thla a, damdawi-in panpui a nih hnuah a hliam tuar loin a thi. He thil thleng chungchangah hian FIR thehluh a ni a; Champhai police-te'n mi pakua an man.

March 29, 2025 zan khan PS Muanga hi mi eng emaw zatin an sual rawn ni ngei nia hriat a ni a; a mawhphurtua puh mi pakhat Lalruatthara, Champhai Kanan Veng nia insawi chu March 29 zan khan Champhai Police hnenah a inpe. Police-in an chhui zuina kal zelah thu zawhfiah turin mi pariat an man belh a ni.