Lawngtlai dist-ah nuai 168 man sawhthing lei

Lawngtlai District Agriculture Marketing Committee (DAMC) chuan nimin khan DC conference hall-ah Lawngtlai district-a kum 2025-a sawhthing lei leh hralh khârna hun an buatsaih a, Adviser to CM Dr Lorrain Lalpekliana Chinzah, MLA-in a hmanpui. Kuminah Lawngtlai district-ah cheng nuai 168 man sawhthing quintal 3,783.87 lei a nih thu an tarlang.

DAMC member secretary Lalremmawia Colney tarlan danin, Lawngtlai district-ah sawhthing secondary collection centre (SCC) pali - Bungtlang, Sangau, Siachangkawn leh Diltlangah te a awm. Sawhthing lei thawh khatna, February 20 - March 20, 2025 chhungin sawhthing kg. 1,79,769 lei a ni a; Rs 89,88,450 hman niin, sawhthing chingtu mi 212 hnenah pek a ni.

Sawhthing lei thawh hnihna, April 21 - June 15, 2025 chhungin kg. 1,98,618 lei niin, Rs 78,32,038 hman a ni a; sawhthing chingtu mi 248 hnenah pek a ni. Lawngtlai district-a sawhthing lei zawng zawng chu qtl 3,783.87 a ni a, Rs 1,68,20,488 man a ni.

Dr Lorrain Lalpekliana chuan, kut hnathawktute chawi kân chu Mizoram sorkar auhla ber a nih thu sawiin, "Kut hnathawktute'n hlâwkna tak tak an dawngin ka hria. Sawhthing bikah sorkarin kg khat Rs 50-a leisakin, Mizoram pumah sawhthing hralhna aṭangin cheng vbc 17.38 hmuh a ni a, sorkarin cheng vbc 67.55 a sen belh," a ti.