Hindi teacher (regular) post ruak tam lutuk sorkara thlen an rêl

Mizoram Hindi Prachar Sabha (Mizoram Board of Hindi Propagation) hotute leh Mizoram Hindi Training College hotute chu July 3, Ningani khan an inkâwm a; Mizorama Hindi tihhmasawn dan tur sawihoin, Hindi teacher (regular) post ruak hnawhkhah loh tam lutuk chu sorkarah thlen an rêl.

MHPS leh MHTC hotute chuan, Mizoram sorkara sikul hrang hrangah Hindi zirtirtu nghet post ruak a tam avangin, post ruakte hnawhkhah a nih theih nan sorkarah thlen an rel a; School Education department-a deputy director (Hindi Wing) post ruak reng chu hnawhkhah a nih theih nan sorkara thlen an tum bawk.

Hindi teacher nei reng chunga sikul ṭhenkhata Hindi subject zirtir loh chungchang te, CSS hnuaia Hindi zirtirtute Samagra hnuaiah an awm tâk avangin Samagra-ah Hindi Education Officer an awm ve a ṭul dan te, Mizo zirlaite'n Hindi a pawimawhzia an hriat a, MBSE hnuaiah compulsory subject-ah Hindi telh ni lo mah se, Class-X zirlaite'n MIL-ah Hindi subject lak tel nachâng an hriat theih dan turte sawiho a ni a; heng chungchang hi sorkar thuneitute hnena thlen an rêl a ni.

Hindi zirlai tam zawkte Mizoram Hindi Training College-a an luh/zir theih nan leh, Central Hindi Directorate-in a phal anga MHPS-in diploma training course kalpui a tum chu a hlawhtlin theih nan hmalak an tum thu an tarlang bawk.