NDPS Act kaihhruaina (SOP) tlangzarh

Mizoram State Legal Services Authority (MSLSA)-in Standard Operating Procedure and Flowchart under the NDPS Act, 1985 an buatsaih chu July 3, Ningani tlai khan Gauhati High Court judge pathum - Justice Michael Zothankhuma, Justice Nelson Sailo leh Justice Marli Vankung ten an tlangzarh a; Training of Trainers buatsaih nghal a ni.

MSLSA executive chairman ni bawk Justice Michael Zothankhuma chuan, Mizoramah ruihhlo a tam thu leh jail-ah leng tur zat aia tam dah luh a nih thu a sawi a, "Mizorama ruihhlo man zin dan en chuan, NDPS court pakhat aia tam kan mamawh a, Central Jail pawh tihchangtlun a ngai a ni," a ti.

Justice Michael Zothankhuma chuan, Mizoramah ruih theih thil hmuh theih mai a tam thu sawiin, "Hetiang renga kan ram hi a kal chuan chhiatna nasa tak kan hmachhawn dawn... Dan ṭha tak awm mah se,dana bawhchhetute'n relhrûk dan an zawng reng. Chuvangin, danhremite pawhin inzirna atana hmang a, dan relhrûk theihna lai kar âwlte hnawhkhah tum a ṭul," a ti a; NDPS Act SOP chu ṭangkai taka hman a nih a beisei thu a sawi.

Justice Nelson Sailo chuan, SOP ṭhat dan tur leh ṭangkai taka hman a nih tur thu te, thil sual titute man an niha dan ang taka hremna an hmuh theihna aṭante a ṭangkai tur thute a sawi. Justice Marli Vankung chuan, NDPS case tamn a chhan chu duhâm vang a nih thu sawiin, "Hei hian mihring leh khawtlang nun a tichhia a ni," a ti.

MSLSA member secretary Vincent Lalrokima chuan SOP chungchang sawiin, dan kengkawhtute'n ruihhlo laka pawikhawihtute an manin, dan ang taka hrem a nih theih nan SOP leh Flow Chart buatsaih a nih thu a sawi.

Aizawl Additional District & Sessions judge Lalngaihmawia Zote-in NDPS Act tlawhchhana mante chungchanga hmalak dan tur SOP leh Flowchart buatsaih a nih dan leh a kalphungte a sawifiah bawk.

SOP tlangzarh zawhah training buatsaih nghal a ni a; Narcotics SP Lalrinpuia Varte, Excise & Narcotics joint commissioner Peter Zohmingthanga leh civil judge HT Lalmawizuala ten thil pawimawhte an zirtir a ni.