Award dawng tur Vantawng CLF

Mizoram State Rural Livelihoods Mission (MzSRLM) hnuaia Vantawng Cluster Level Federation (CLF), Thenzawl chuan India ram puma federation ṭha thlanna, Ministry of Rural Development (MoRD)-in a buatsaih Atmanirbhar Sangathan Award, 2024-ah lawmman pakhatna dawng tura thlan a ni.

Award dawng tur hian India rama cluster federation 33,736 endik niin, phase li-ah ṭhen an ni a; Vantawng CLF hian North East Region aṭangin pakhatna an dawng. Award hi CLF-te'n an hnuaia self help group member thingtlanga chengte tana hna an thawh ṭhat vanga pek a ni.

Atmanirbhar Sangathan Award, 2024 hian Rs 3,00,000 a keng a; kumin Independence Day-ah New Delhi-ah hlan a ni ang.

November 22, 2024 khan MzSRLM hnuaia Tuikum Cluster Level Federation, Chhingchhip chuan 'Best SHG Federation Award Ceremony, 2024' an lo dawng tawh bawk.