KHAWTHLIR

Thisen pe

Leitlangpui Higher Secondary School NSS chuan nimin khan thisen pek an huaihawt a; Lunglei Civil Hospital tan thisen unit 28 an pe a, petute mipa 23 leh hmeichhia panga an ni.

Health Sunday & Hospital Sunday

Naktuk July 6, Pathianni hian Mizoram Presbyterian Kohhranin Health Sunday & Hospital Sunday an hmang dawn. Naktuk chawhnu inkhawmah Health Sunday an hmang dawn a, thupui chu 'Stroke leh a inven dan' tih a ni a; zan inkhawmah Hospital Sunday an hmang dawn a, thupui chu 'Tihdam rawngbawlna' tih a ni. Mizoram Synod hian damdawi-in pahnih - Aizawlah Synod Hospital leh Lungleiah John Williams Hospital an nei a ni.

Raltlante tan blanket sem

Khawzawl bawrhsap K Vanlalṭhiana chuan nimin khan Khawzawl khaw chhunga VC hrang hrang hnenah an huam chhung ṭheuha Myanmar leh Manipur raltlante hnen pek tur blanket a hlan. Bawrhsap chuan, raltlante chu theihtawpa tuamhlâwm leh ṭawiawm a ṭul thu sawiin, VC-te chu an mamawh leh ṭul dangte sawi zel turin a chah. Khawzawl district-ah hian Myanmar raltlan mi 304 leh Manipur raltlan mi pali an awm mek a ni.

Dan bawhchhia mi 1,266 an man

June 2025 chhung khan Aizawl District Transport Office hnuaia enforcement staff chuan lirthei dan bawhchhia mi 1,266 an man a, sum an chawitir tling khawm chu Rs 26,10,335 a ni. Dan bawhchhe dang mi 63 chu sum chawi tur an pek hma chu document an hrênsak. Dan bawhchhia tam ber chu sumdawnna thil bungraw phur lirthei an ni.

Governor ṭanpuina

Mamit district bawrhsap K Laltlawmlova chuan Governor-in home/centre chhawmdawlna tur a pekte chu nimin khan a hlan. Mamita Joshua's Children Home, Buannel Home leh Bethany Swadhar Greh hnenah Rs 25,250 ṭheuh hlan a ni.

LMV tlân khap

Traffic SP Ruatsanga Ralte chuan hriattirna chhuahin, Saron Venga Bethlehem pêng leh Modern School pêng inkarah lirthei tlan dan a felfai zawk theih nan leh mipui him nan zing dar 8 leh chawhma dar 11 inkar leh, tlai dar 3-6 inkarah he kawngah hian LMV leh a chung lam tlan khap a nih thu a tarlang.

Laptop pe

Lawngtlai East bialtu MLA Dr Lorrain Lalpekliana Chinzah, Adviser to CM chuan nimin khan a pisaah a bial chhunga HSSLC leh MZU under graduate result chhuaka top 10-a lang zirlai paruk hnenah lawmpui thuchei leh laptop a hlan. MLA chuan, zirlai hlawhtlingte chu theihtawp chhuaha ṭan la zel turin a chah.

Rakzu an man

Lunglei Police leh Assam Rifles te chuan July 3, Ningani khan Eeco van MZ-02 C-6551 aṭangin rakzu litre 124 vel, Rs 62,000 hû vel an man. Zu neitua puh Hironjit Chakma (27) s/o SM Chakma, Tipperaghat, Nirundhan Chakma (29) s/o SK Chakma, Chawngte-C leh Zinda Chakma (25) s/o Rochamon Chakma, Chawngte-C nia inchhalte an man nghal bawk.

AR-in heroin man

Assam Rifles chuan tun hnai khan Dawn leh Hnahthial inkar kawngah mi pali - F Lallianzuali (40( d/o Vanlalchhunga, Malsawmtluanga (33) s/o Lalhmingmawia, Lalhmunsiami (43) d/o Dohranga leh Lalmuansangi (25) d/o Lalramliana te hnen aṭangin heroin gram 109.08 an man a; Excise & Narcotics department hnenah an hlan.