Lok Sabha MP-in AVDB bus a pe

Lok Sabha MP Richard Vanlalhmangaiha chuan MPLADS hmanga blood donation bus tur Tata Winger New Model (13 seater) a lei chu July 5, Inrinni zing khan Association for Voluntary Blood Donation, Mizoram (AVBD) hnenah a hlan.

Bus inhlanna hi Model Blood Bank, Civil Hospital, Aizawl tualah neih a ni a, AVBD vice president K Zothanpara'n a kaihruai. MP hian bus chabi leh document pawimawhte AVBD president C Lalnunnema hnenah a hlan a ni.

Richard Vanlalhmangaiha chuan, thisen pek a ngaih pawimawh thu leh amah pawhin thisen a pek ve ṭhin thu a sawi a; AVBD-in a hnena bus an dil pawh tihhlawhtlin ngei a duh thu leh blood donation bus thar chu a MP fund hmanna puitling hmasa ber a nih thu a sawi.

Mizoram Lok Sabha MP chuan, bus thar chuan blood bank-a thawktute rilruah phûrna leh inpek lehzualna thar tuh se a duh thu sawiin, "Damlo thisen mamawhte'n a hun takah thisen dawng theih phah nan hman ngei ni se ka duh," a ti.

AVDB President chuan, an dilna ngai pawimawha Richard Vanlalhmangaiha'n bus a pe chu an lawm tak zet thu a sawi. Civil Hospital, Aizawl senior medical superintendent Dr Lalchhuankimi pawhin thu sawiin, Lok Sabha MP-in AVBD hnena bus a pek Civil Hospital, Aizawl hman atana ruahman a ni chu an lawm thu leh, ṭangkai taka hman a nih tur thu a sawi bawk.

Bus hlanna inkhawmah hian Civil Hospital, Aizawl medical superintendent Dr K Rothangpuia, model blood bank HoD Dr C Zohmingliani, AVBD hruaitute leh Civil Hospital leh blood bank-a thawkte an tel.

Blood donation bus tur hi October 2024 vel aṭangin buaipui ṭan a ni a, air condition-a thuam niin, Rs 18,22,027 sênga lei a ni.

AVBD Mizoram chuan an dilna leh ngenna Lok Sabha MP Richard Vanlalhmangaiha'n ngaih pawimawh hmasakah neia an tihhlawhtlinsak an lawm tak zet tih an tarlang a; ram leh hnam rawngbawl hna a thawhna zel turah duhsakna sang ber an hlan a ni.