ATL road-a leilung lakte CRRI hmunpuiah thawn tawh

Aizawl - Thenzawl - Lunglei (ATL) Road zir chiang tura Mizoram sorkarin a rawih Central Road Research Institute (CRRI)-in leilung an lakte chu CRRI hmunpui Delhi-ah thawn a ni tawh.

CRRI aṭang hian scientist pathum leh technician pahnih an rawn kal a, June 26, 2025 khan Lunglei an thleng. Lunglei PWD hotute kaihhruaina hnuaiah kawng zir chian hna an thawk. ATL kawnga Kanghmun South leh Pukpui inkara leilungte zir chiang turin sample an la a ni.

Leilung an lakte hi a ṭul anga buaipui a nih hnuah PWD-te chuan CRRI hmunpuiah an thawn tawh. CRRI hmunpui lam hian an lo zirchian ve leh hnuah kawng siam dan tura rawtna an rawn thawn dawn a, ni 45 chhunga rawn thawn hman tura beisei an ni.

Kawng siam dan tur rawtna a awm hunah PWD-te chuan estimate siamin, kawng siam a nih theihna atan hma an la chhunzawm ang.