MUHCS-ah a inziah luh theih tawh rih loh; Chhungkaw 2,97,516 vel an inziak lut

Mizoram Universal Healthcare Scheme (MUHCS) ah June, 2025 thleng kha inziah luh theih a ni a, chhungkaw 2,97,516 vel an inziak lut. Hetih lai hian, August 2025 chhung khawngaihna hun (grace period) hawn leh chhungin inziah luh leh theih a ni ang.

MUHCS-a inziak lut zingah hian a tam ber chu a hranpaa inziah luh ngai lo PMJAY chhungkuate an ni a, anni ho hi chu MUHCS huamtir nghal niin, an vaiin chhungkaw 2,19,000 an ni. A dawttu chu sorkar hnathawk niin mi 43,470 ziah luh an ni. Sorkar hnathawkte pawh hi a hranpaa inziah luh ngai loin, thla tin an hlawh aṭangin MUHCS atan thawhtir an ni a, an hnathawh azirin an thawh zat a inang lo.

Mipui nawlpui zingah chuan chhungkaw 12,989 an inziak lut a; Rs 2,500 manah chhungkaw 11,283, Rs 5,000 manah chhungkaw 1,088 leh Rs 10,000 manah chhungkaw 618 an inziak lut. Pensioner zingah chhungkaw 10,057 an inziak lutin, category A-ah chhungkaw 8,298 leh category B-ah chhungkaw 1,759 an lut a ni.

Centrally sponsored scheme hnuaia thawk chhungkaw 12,000 vel an inziak luta ngaih a ni. CSS hnuaia thawk inziak lut zat chiah hriat theih a la ni lo a, hei vang hian MUHCS-a chhungkaw inziak lut zat dik tak hriat theih a la ni lo.

MUHCS-a inziah luh hun Jun3e 30 khan a tawp a, ruahmanna siam lawk angin August 2025 chhung grace period hawn a ni dawn. Grace period-ah hi chuan a hmaa chawi ngai let zel chawi a ngai tawh dawn a ni. Tun ṭum bak hian sorkar kum kal mekah MUHCS-a inziah luhna hun hawn a ni tawh dawn lo.