KHAWTHLIR

MHIP Day lawm

Nimin July 6, 2025 kha MHIP Day vawi 51-na a ni a, Pathianni a nih avangin MHIP branch hrang hrangte'n July 4 zan leh July 5 chhunah an lawm. MHIP Day hi MHIP General Headquarters hruaitu te, ram hruaitute leh Central YMA hruaitute chuan hmun hrang hrangah an hmanpui a ni.

Thisen pe

July 5, Inrinni khan ṬKP, Mission Vengthlang Bial chuan Civil Hospital, Aizawl tan thisen unit 90 an pe a, petute mipa 64 leh hmeichhia 26 an ni. KṬP, Durtlang Leitan Branch-in an kohhran hall-ah Synod Hospital tan unit 35 pein, petute mipa 30 leh hmeichhia panga an ni a; SAY, Central South Division pawhin ZMCH tan thisen unit 39 an pe a, petute mipa 29 leh hmeichhia 10 an ni.

Football kailawn hawn a ni

Lawngtlai district-a ṭhalaite ruihhlo laka an fihlim theihna tura football kaltlanga hmalakna, 'Lawngtlai District Football Hmasawnna Kailawn' chu July 4, Zirtawpni khan district bawrhsap Cheemala Siva Gopal Reddy chuan CYLA Playground-ah a hawng. Kailawn-in a tum chu football ngainatu, kum 6 aṭanga senior ber thlengin mumal leh awmze nei zawka football an khelh a, eizawnna tlak leh hna hmuh nana hmalak a ni.

ATM booth

Mizorama mimal ATM booth parukna tur chu July 5, Inrinni khan Sakawrdaiah hawn thar a ni a, Sakawrdai VCP T Lalropuia'n a hawng. Mimal enkawl ATM booth hi RBI hnuaia license nei Vakrangee Kendra Company Ltd. hnuaia din a ni a, eng bank ATM card pawha pawisa lakchhuah theih a ni.

Cooperation Minister-in M-PACS a hawng

Co-operation minister PC Vanlalruata chuan July 4, Zirtawpni khan Khumtung khuaah Rumliana Multipurpose Primary Agriculture Credit Society (M-PACS) a hawng a; cooperative society ṭha leh daih rei ni tur chuan langtlak taka an inrelbawl a pawimawh thu sawiin, "Mipui rin ngama kal a ṭul a, rinawmna leh taimakna nen ke i pen ang u," a ti.