Minister-in MIFCO hmunpui a tlawh

Horticulture minister C Lalsawivunga chuan July 4, Zirtawpni khan Chhingchhipa Mizoram Food & Allied Industries Corporation (MIFCO) hmunpui a tlawh a, MIFCO hotute nen an harsatna leh dinhmunte an sawiho.

Minister hian MIFCO hmunpuite hi chipchiar takin a fang a, Handholding hnuaia sawhthing sawngbawlna khawl hnathawh dante a en nghal. MIFCO hmunhma ṭangkai zawka hman dan turte enfiahin thawktute dinhmun leh harsatna tawh dante a hnenah an lo thlen a ni.

C Lalsawivunga chuan, MIFCO leh Horticulture department-ten thawhhona ṭha tak an neih a pawimawh thu a sawi a, "Kut hnathawktute tana thawk in nih angin in hmunhmate hmang ṭangkai a, ngaihtuahna zau zawk seng a, intihchak tawn dan ngaihtuah a ṭul," a ti.

Horticulture hnuaia thlai (horticulture crop) hrang hrang - sawhthing, lakhuihthei, sapthei leh a dangte sawngbawltu MIFCO chu Horticulture department nen thawhhona ṭha tak neia kal chhoh dan ngaihtuah a ṭul thu Horticulture Minister chuan a sawi.

MIFCO chairman Lalṭhazuala Rawite pawhin thu sawiin, thawktute'n hlawh an la mumal thei lo ṭhin chu sorkar hmalakna zarah kum kal ta aṭang khan mumal zawkin hlawh an lak tawh thu leh a lawm thu a sawi a; MIFCO hmalakna leh hmachhawp hrang hrangte a tarlang nghal bawk.

Tarlan danin, Chhingchhipah hian MIFCO chuan petrol pump siam tumin hma an la a, phalna pawh hmuh fel tawh niin, a hmunhma tur an lai mek.

Minister hi Horticulture director CH Lalmuanpuia bakah sorkar hotu dangte'n an ṭawiawm a ni.