Hotel management training course hawng

Labour, Employment, Skill Development & Entrepreneurship (LESDE) minister Lalnghinglova Hmar chuan nimin khan Mizoram Youth Commission (MYC) auditorium-ah MYC, Honda India Foundation leh Visan Foundation te buatsaih 'Project Buniyaad Hotel Management (Food & Beverages) Training Course, Phase-II' a hawng.

LESDE Minister chuan, khawvel ṭhang zelah mikhual dawnsawn leh inenkawlna huang (hospitality sector) a ṭhan chak thu a sawi a, "Hotel management, nursing leh caregiving-ahte mihring mamawhna a sang chak hle a, hengah hian Mizo ṭhalaite'n theihna sang tak kan nei a, hna thawhna tur kawng zau tak a inhawng a ni," a ti.

Japan ramah hnathawk turin Mizo nurse 15 thawn an nih tawh thu sawiin Lalnghinglova Hmar chuan, "Thawn chhuah leh mai theih tur Japan ṭawng zir mek mi 78 an awm. Ram dangah Mizo ṭhalaite rintlak leh awmze nei zawka tam lehzual an thawh chhuah thei nan Ministry of External Affairs hnenah LESDE department chuan recruiting agency ni tura dilna a kalpui mek," a ti a, dilna a hlawhtlin thuai a beisei thu a sawi.

Project Buniyaad Training hi thla hnih awh a ni a, MYC Coaching Centre-ah kalpui a ni. Phase-I chu September 2024 - March 2025 khan kalpui niin, Aizawl leh Lunglei MYC centre-ahte neih a ni a, mi 122-in training an zo a, an zinga mi 97 chuan India rama hotel changtlung tak takahte hna an thawk tawh.

Phase-II hawnnaah hian Honda India Foundation chuan CSR kaltlangin MYC Coaching Centre-a hman tur smart TV pathum (75 inch) an hlan a; Honda India Foundation chief manager Vishnu Dixit bakah Visan Foundationa leh MYC hotu te, zirlaite an tel a ni.