Scholarship pek chhuah vangin zirlai pawlte an lawm

Mizo Zirlai Pawl leh Mizo Students' Union chuan thuchhuah siamin, Ministry of Tribal Affairs hnuaia Scholarship Division-in Post-Matric Tribal Scholarchip 2023-24 leh 2024-25 atana July 7, Thawhṭannia Rs 50,42,81,000 a pe (sanction) chu lawmawm an tih thu an tarlang.

MZP chuan, sorkar laipuiin zirlaite tana scholarship sanction order a tichhuak chu an lawm thu sawiin, "Zirlaite'n a rang thei ang bera an dawn theih nan MZP chuan a ṭul angin hma a la chhunzawm dawn a, zirlaite hnenah a rang lama sem a nih theih nana hma la turin Mizoram Scholarship Board kan ngen a ni," an ti.

Scholarship chungchangah theihtawpa hma an lak thu sawiin MZP chuan, "Governor kaltlangin Ministry of Tribal Affairs lam hotute pawh lehkha pek tawh a ni a, Delhi-ah Ministry of Tribal Affairs hotute pawh MZP hruaitute'n hmuin an zuk bawhzui tawh. Lok Sabha MP Pu Richard Vanlalhmangaiha pawhin theihtawp a chhuah thu MZP hruaitute a hrilh hnu lawkah a hlawhtlinna hmel hmuh a ni hi kan lawm hle," an ti.

MSU chuan, scholarship chungchangah nimin khan Mizoram Scholarship Board secretary Dr PL Ramliana a pisaah an hmu thu sawiin, sorkar laipuiin scholarship tur cheng nuai 5,042.81 a rawn pek thu a lo hrilh tih an tarlang a; an lawm thu an sawi.

Scholarship chu zirlaite account-ah a luh vat theih nan an vil zui reng thu sawiin MSU chuan, "Scholarship sum sanction a nih theih nan Chief Minister ngen angin MP Pu Richard Vanlalhmangaiha'n theihtawp a chhuah a, scholarship min nawr chhuahpuinaah Mizo zirlaite aiawhin lawmthu kan sawi a ni," an ti.