Ralthuam lek lo turin CNO leh HPO ngen

Zo Re-Unification Organisation (ZORO) chuan thuchhuah siamin, Myanmar ram Chin state-a Chin National Organisation (CNO) leh Hualngoram Peoples Organisation (HPO) inkara buaina chhuak a, inkahna leh thisen inchhuahna a thleng chu pawi an tih thu an tarlang a; ralthuam lek tawh lo turin an ngen.

ZORO chuan, CNO leh HPO buaina vanga pawi sawi lo nunau thlabâr manganga sang tam tak an awm leh mahni in leh lo tlansan a ngai chu pawi an tih thu sawiin, "Unau, thisena inzawm nunna inlaksak tuma ralthuam hial chelek a ni ṭhin hi ṭha kan ti lo hle. Tun hnuah hetianga unau inkara buaina chhuakah ralthuam chelek zawnga che tawh lo turin kan unau Zo fa chi tinte kan ngenin kan hriattir a ni," an ti.

CNO leh HPO te chu inngaichâng tawn tur leh boruak tipunlun zawnga hma la tawh lo tura ngenin, ZORO chuan, "Unau inkara inremna a awm theihna turin a khirh zawng ni lo, a dam zawnga chinfel dan kawng zawng hram hram turin kan ngen a ni," an ti a; remna a awm theih nan a ṭul anga hmalak an tum thu an tarlang.

ZORO chuan, Myanmar ramah sipai sorkar avangin mipuiin harsatna tam tak an tâwk tih sawiin, "Ṭan rual hun tak meuh meuh a nih laia keimahni leh keimahni kan lo inbeihna hian kan tan rah ṭha a chhuah dawn lo a, awpbehna hnuaia awmna nikhua tiseitu mai a ni dawn a ni," an ti.