2024-25 chhungin Hnahthial dist-ah HIV vei mi 15 hmuh chhuah an ni

Hnahthial District AIDS Prevention and Control Committee chu an chairman K Vanlalruati, bawrhsap kaihhruaiin nimin khan an ṭhukhawm a; kum 2024-25 chhungin Hnahthial district-ah HIV vei mi 15 hmuh chhuah a ni tih tarlan a ni.

Ṭhutkhawma tarlan danin, April 2024 - March 2025 chhung khan Hnahthial district-ah HIV vei hmuh chhuah mi 15 zinga 10 chu mipa niin, panga chu hmeichhia an ni a; kum 35-49 inkar an tam ber. HIV vei hmuh chhuah thar zinga pakua chu mipat hmeichhiatna aṭanga kai an ni a, hriau thianghlim lo inhman ṭâwm aṭanga kai mi pali an awm.

Hnahthial district-ah HIV vei si lo, mipat hmeichhiatna hman aṭanga kai theih sexually tranmitted infection (STI) leh natna chi dangte vei an tam a, tleirawl zingah a tam zual tih tarlan a ni bawk.

Meeting-ah hian zirlaite'n HIV leh STI chungchang an hriat chian lehzual theih nan August 20, 2025-ah sikul naupangte tan Red Ribbon Quiz Competition buatsaih an rel a; school mala ti ṭhate chu district pum huap intihsiakna, September 3, 2025-a neih turah an tel leh ang.

Hnahthial Bawrhsap chuan, HIV vei tam chhan pakhat chu ruihhlo vang nia a lan thu sawiin, "Ruihhlo hman khawloh hian thil ṭha lo tam tak a thlen a, HIV do nan chang ni lo, sualna dang hrang hrang do nan ruihhlo tawlh rûk kan dan a ṭul takzet," a ti a; Hnahthial district leh Myanmar inrina hmunte vil uluk lehzual turin Police leh Excise & Narcotics hotute a chah.