MGNREGS-a job card 2,13,197-ah hna thawk thei mi 2,13,444 an awm

Rural Development & Administration minister Prof. Lalnilawma kaihhruaiin nimin khan Aijal Club-ah 'State Employment Guarantee Council' (SEGC) an ṭhu. Ni 100 inhlawhna (MGNREGS) hnuaia job card pek chhuah tawh 2,13,197 zinga hna thawk thei chu 2,13,444 an nih thu tarlan a ni.

Ṭhutkhawma tarlan danin, MGNREGS hnuaiah kum 2025-26 atan hna 5,758 thawh ṭan tawh niin, hna 3,326 zawh a ni tawh. Job card 2,13,197 pek chhuah tawh zinga 2,12,676 chu a la nung a, chu'ng zingah chuan hna thawk thei (active worker) 2,13,444 an awm.

Mission Amrit Sarovar Phase-II kalpui mek a ni a, hmun 131-ah dil thar siam leh a awm sa siamṭhat (renovation) nan hmalak mek a ni. Social Audit Report aṭangin MGNREGS hnathawhnaa harsatna hrang hrangte chinfel a ni.

SEGC chuan kum 2025-26 aṭangin State Legislature-ah annual report pek ṭhin ni se, an ti a; MGNREGS hnuaia hnathawhte zir chiang turin State Institute of Rural Development (SIRD) ruat a ni. MGNREGA staff-te hlawh pun leh Employee Provident Fund-a hamṭhatna an dawn ve theihna tur chungchang ngaihtuahtu tur committee din an rel bawk.

Prof. Lalnilawma chuan, SEGC chu Mahatma Gandhi National Rural Employment Guarantee Act, 2005 hnuaia hnathawhte endik leh thlir let hna thawk tura din a nih thu sawiin, "Mipuite’n an chhawr ṭangkai ngei tur hnate uluk zawka thlan leh thawh kawngah state level leh district level-a convergence committee-te’n thawhhona ṭha an neih a pawimawh," a ti.

RDA Minister chuan, Reieka Ngai tlang lâwnna kailâwn (step) chu MGNREGS hnuaia Project Rotling 15 thlan zinga mi a nih thu a sawi a; Social Audit Unit-in financial year 2024-25 chhunga Mizorama khaw 874-a MGNREGS hnuaia hnathawhte an endik kim vek thei chu fakawm a tih thu a sawi bawk.