KHAWTHLIR

Legal Aid Clinic hawng

Mizoram State Legal Services Authority executive chairman Justice Michael Zothankhuma, Gauhati High Court judge chuan nimin khan Cherhlun leh North Vanlaiphaiah Legal Aid Clinic a hawng a, Cherhlun leh North Vanlaiphai VC hnenah silpauline eng emaw zat a pe bawk. Michael Zothankhuma chuan, Legal Aid Clinic chu mipuiin dan leh hrai kaihhnawih thurâwn an lak theihna tur leh harsatna leh mamawhna an neiha an pan theih tura hawn a nih thu a sawi.

Bungrua inhlan

Siaha district bawrhsap VL Hruaizela Khiangte chuan nimin khan Siaha District Hospital hnenah life support ambulance pakhat, pik-up pakhat leh solar light pakua a hlan. Thil hlante hi North Eastern Council (NEC) Special Development Project aṭanga Backward Community of Mara Community, Tipa RD Block, Siaha district hnuaia dawn a ni a; Siaha DC pisaah inhlanna hun hman a ni.

Thlai ṭiak 2,357 sem

Khawzawl Krishi Vigyan Kendra chuan nimin khan Pradhan Mantri Rashtriya Krishi Vikas Yojana hnuaiah Khawzawl, Khualen, Rabung, Neihdawn, Chawngtlai, Ngaizawl leh Khawhai khuaa loneitute hnenah serthlum, serfáng, zawngṭah leh khanghu ṭiak 2,357 an sem. Thlai ṭiak semna hun hi Khawzawl bawrhsap K Vanlalṭhiana'n a hmanpui a; thlai ṭiak dawngtute a lawmpui thu sawiin, hmasawn nan hmang turin a chah.

Vawiinah bank-te nuar dawn

Central Trade Union chuan vawiin hian India ram pumah lungawi lohna an lantir dawn. Nawrh huaihawt tur hi Mizoram Rural Bank leh Mizoram Cooperative Apex Bank-a thawkte chuan an zawm ve dawn a, an branch hrang hrangte khâr a ni dawn. Bank pahniha thawktu pawlte chuan, Central Trade Union thil phût lian tak, sorkar laipuiin Labour Code a siam dodâlna leh thil phût chi hrang hrangte chu an thlâwp thu an tarlang.