KHAWTHLIR
Duty leh dawn
Vairengte Joint Task Force leh Vairengte SDO (C) Issac C Lalrempuia hoa nimina ṭhukhawm chuan, Vairengte VC-I hnuaia task force-te'n duty tihtawp an rêl tawh chu an sawiho a, inbiakremna a awm avangin VC-I hnuaia task force-te chu an duty chhunzawm leh dawn. Vairengte VC-I task force-te an duh dan chu sorkarah thlen a ni ang. Vairengte VC-I hian mipui ni tin mamawh ni lo bungraw dang phur an veivâk ṭhin chu ṭha ti loin, Pathianni khan duty chhunzawm loh an rél a ni.
Ṭanpui tum
Champhai Ṭhalai Pawl (CṬP) chuan an district chhung mi, inkhârkhip vanga state páwna harsatna tâwk an awm chuan ṭanpui turin hma an la dawn a, chutiang mi an awm chuan inthlahrung loa CṬP president Lalnunsanga Fanai hnenah inhriattir turin an chah.
Thisen pe
Aizawl Venglai Branch KṬP chuan nimin khan Aizawl Civil Hospital-ah thisen unit 34 an pe a, a petute mipa 29 leh hmeichhia panga an ni. Individual voluntary donor mi 13 an awm bawk.
Invènna sem
Champhaia PPE Donation Campaign Volunteer Group-te chuan Covid-19 laka invenna hmanraw chi hrang hrang an buaipui ṭhin a, April 26, Pathianni thleng khan personal protective equipment (PPE) 278, hmai tuamna 1,860, cotton suit 13, kut sil faina (hand sanitizer) litre hnih leh hmunhma phuh faina (disinfectant) litre 15 an pe chhuak tawh. Covid-19 laka invenna hmanruate hi Champhai district-a khaw hrang hrangah an sem a, khaw 15 vel tih loh chu an pe vek tawh. Khawzawl damdawi-in tan PPE leh hmai tuamna an pek bakah, task force duty, police, damdawi-ina thawkte leh chanchinbumite hnenah an pe tawh bawk.
CM relief fund
Covid-19 dona atan Chief Minister's relief fund-ah sum a luh belh zel a, nimin tlai thleng khan cheng vbc. 6.64 a lut tawh. CM relief fund aṭang hian cheng vbc. 4.62 sem chhuah a ni tawh.