SBTC-in thisen pek chungchang rêl

Mizoram State Blood Transfusion Council ṭhutkhawm vawi 34-na chu nimin khan chairman H Lalengmawia, Health secretary hoin a pisaah neih a ni a; thisen component (ṭhen) pakhat - Plasma ṭangkai zawka hman a nih theih dan tur leh thisen pek leh a kaihhnawih thil pawimawhte an rêl.

Ṭhutkhawmah hian kum 2024-25 chhunga Mizorama thisen pek dinhmun tarlan a ni a; SBTC chuan Mizo mipui, tlawmngaia thisen pe ṭhin zawng zawng leh blood bank hrang hranga thawktute chungah an lawm thu an tarlang a, mahnia blood bank-a kala thisen pek uar zel turin Mizoram mipui an sáwm bawk.

Tarlan danin, kum 2024-25 chhung khan Mizoram­ah thisen unit 34,752 pek niin, unit 32,566 chu pek bik nei loa a thlawna pek a ni a; blood dona­tion camp vawi 611 neih niin, chungah chuan thisen unit 22,602 pek a ni.