KHAWTHLIR

NSS-te'n thisen pe

Hrangbana College, Republic Higher Secondary School leh JL Higher Secondary School-a NSS-te chuan nimin khan Civil Hospital, Aizawlah thisen unit 172 an pe a, petute mipa 123 leh hmeichhia 49 an ni. Tun hnaiah Aizawl Civil Hospital blood bank-in thisen an tlachham a; Association for Voluntary Blood Donation-in an ngen angin zirna-in pathum hian thisen an pe a, Hrangbana College-in unit 75, Republic HSS-in unit 64 leh JL HSS-in unit 33 an pe a ni.

Minister-in lawmpui

Minister of state Lalnghinglova Hmar chuan nimin khan a pisaah a bial chhunga zirlai, Mizoram University under graduate examination 2025-a subject hrang hranga top 10-a lang mi pakua hnenah lawmpuina thuchei leh Rs 10,000 ṭheuh a hlan. Minister chuan, exam-a ti ṭha si, hna zawnnaa hlawhtling thei lo a awm theih tih sawiin, "Kan exam-a kan zir hi eizawnnaa kan chantir a pawimawh a, chu chu kan nu leh pate pawhin an nghahhlelh ber a ni," a ti a, inthlahdah loa ṭang zel turin a fuih.

MLA-in hmanpui

Artificial Limbs Manufacturing Corporation of India (ALIMCO) chuan nimin khan Salem Veng YMA Hall-ah pianphunga rualbanlote leh kum 60 chung lamte an hmanraw ang hmanrua pek an nih theihna atan enfiahna hun an buatsaih a, bialtu MLA Lalchhuanthanga'n a hmanpui. MLA chuan, rualbanlo leh upate harsatna sutkian chu Pathian duh zawng a nih thu sawiin, "ALIMCO kaltlang hian kan bial chhung veng hrang hrangah kalpui zel kan tum," a ti.

Draft roll tlangzarh

Chakma Autonomous District Council-a Kamalanagar West MDC by-election neih tura inpuahchahna kal mekah nimin khan Chawngte SDO (Civil) Lalnunpuia Renthlei chuan Kamalanagar West MDC chhunga khaw pathum - Kamalanagar-IV, Saizawh West leh Rajmandal draft electoral roll a tlangzarh. Draft roll-ah hian Kamalanagar West MDC bial chhungah voter mi 1,728 an awm a ni.

AR medical camp

Assam Rifles chuan nimin khan Siahaah sipai bángte tan Medical Assistance Camp an buatsaih. Camp-ah hian sipai báng mi 25 telin, an hriselna dinhmun enfiah a ni a, an mamawh ang damdawite a thlawna pek an ni bawk.

Hindi exam result a chhuak

Mizoram Hindi Prachar Sabha chuan nimin khan Hindi zirnaa board exam chi hrang hrang - Prathama & Madhyama (pawl 4 & 6, Praveshika (pawl 8), Prabodh (pawl 10), Visharad (pawl 12), Praveen (BA) first session result a tichhuak a; zirlai exam mi 92 zinga 88 an hlawhtling a, pass percentage 95.65% a ni. Mizo Hindi Zirlai Pawl chuan, zirlai hlawhtlingte an lawmpui rualin, hlawhtling rih lote chu beidawng loa ṭan la zel tura an duh thu an tarlang. India ramah Hindi a pawimawh avangin Mizo zirlaite'n Hindi pawimawhna an hriat an duh thu sawiin, Hindi zir uar turin Mizo zirlaite an sâwm a ni.

Study Group ṭhu

Kolasib bawrhsap Robert C Lalhmangaiha kaihhruaiin nimin khan DISHA Study Group an ṭhukhawm a; sorkar hotu te, Kolasib Sub Hqrs YMA aiawh te, hmeichhe aiawhte leh Study Group member-te an tel. NITI Aayog hnuaia National Institute of Labour Economic, Research and Development adviser Dr Smarajit Chakraborty-in thil pawimawhte a hrilhfiah a ni.

Scheme inhrilhfiah

Nimin khan Siahaa Industries office conference hall-ah Commerce & Industries department hnuaia mipui hamṭhat scheme hrang hrang inhrilhfiahna buatsaih a ni a; Hnahthial DRDO project director M Misael-a'n a hawng. Angel Business Promoters of Mizoram consultant Christopher Lalbiaknia'n thil pawimawh a sawifiah a; sorkar hotu te, self help group member-te telin, zawhna leh chhanna hun hman a ni.