ZPM-in ramri-ah task force-te duty ngai loa force mi vek duty tir ṭha an ti

Zoram Peoples' Movement (ZPM) party president Lallian­sawta chuan, ramri vènna bikah local task force-te tihah ve kher loa âwltirin, anmahni khua/veng chhung venhimna lamah hneh takin duty zawk se ṭhaa a hriat thu a sawi.

ZPM President hian nimin khan thuchhuah a siam a; task force-te chu sorkar din a nih angin sorkarin kaihhruaina a siamte chiang taka zirtir a, an duty dan a rualkhai zawk theih nan District Task Force-te'n uluk lehzualin vil thei se an duh thu sawiin, "Hripui donaa a hmatáwnga awm medical, transport, essential commodity supply chain, administration leh security-a awmte hi hripui vanga thi an lo awm palha tuam hlawmna atan sorkarin insurance ṭha tâwk tak tihsak vek ni se," a ti.

Mizoram chhunga awm sate bik chu Covid-19 lakah an la him rih viaua a lan thu sawiin Lalliansawta chuan, "Kan ramrî hi vèn ngun a ngai hle. India ram pumpuiah lockdown chhunzawm zel a nih pawhin, kan state bik awm dan tur fel taka ruahmanna siam a ngai a ni," a ti a; hripui donaa sorkar hmalakna ṭawiawm turin ZPM an inpeih reng tih a sawi.

ZPM President-in ṭha an tih dan a sawi danin, Mizorama police armed battalion pariat zinga battalion pakhat chu Assam-ah an duty avangin che chhuak thei battalion pasarih an awm a; Assam, Manipur, Tripura leh international border entry/exit point zawng zawngah task force-te duty ve kher ngai loin, police armed battalion-te duty vek se, central sorkar guidelines angin lirthei lût leh chhuakte uluk leh khauh takin vil ṭha an ti a ni.

State páwna Mizo tangkhangte ṭanpuina pek chungchangah Lalliansawta chuan, Mizoram chu state rethei leh intodelh lo ber pawl a ni tih hria a, sorkar dinhmun leh sum harsatzia hriatthiampui tur leh sorkar phurrit siamsak lo leh sorkar lu tihai lo thei ang bera awm turin mi tin a ngen.

Lalliansawta chuan, Mizoram sorkar­in sum a harsatzia hria a, state páwna tangkhang mekte chu chhungkaw sum aṭanga pawisa thawn hram tum turin a ngen a, "Bank an inhawn vek avangin mahni fate leh chhungte pawisa a thawn theih reng a. Lockdown awm lo ta se mahni fate leh chhungte pawisa thawn thei tho tur chuan sorkar tibuai loin thawn hram i tum ang u," a ti. Tangkhangte ṭanpuina pek danah kaihhruaina mumal tak neih a, an chhungte'n pawisa an thawn theih loh tak takte chauh ṭanpuina pek ṭha an tih thu a sawi.

Hripui léng leh inkhàrkhipin a awh chin tur hriat a nih loh avangin sum leh pai leh thil dangte renchem a ngaih thu sawiin Lalliansawta chuan, "Mizo tlawmngaihna vawng nung tlata kan ṭan rual a ṭul. Hripui reh hnuah kan state budget hi kan la hman ho leh vek tur a nih avangin kan neih chhunte awmze nei taka kan hman a ṭul a ni," a ti.

ZPM President chuan, Covid-19 léng karah Mizoram chu Pathian zarah a vannei ber pawl a nih thu sawiin, kan state-a a vei pakhat pawhin hma a sawn zel avang­in lawmawm an tih thu a sawi bawk.