LRS leh LESDE-in surveyor training-na tihchangtlunnaa thawhho dan tur sawiho

Nimin khan Land Revenue & Settlement (LRS) minister B Lalchhanzova leh Labour, Employment, Skill Development and Entrepreneurship (LESDE) minister Lalnghinglova Hmar hoin Secretariat conference hall-ah Industrial training Institute (ITI), Aizawla surveyor course training thuam chaka tihchangtlunnaa thawhho dan tur sawiho a ni.

B Lalchhanzova chuan, surveyor mamawhna Mizorama a sanzia chu tlang hriat a nih thu sawiin, "Empanelment of Survey Firms kalpui mekah pawh surveyor ṭha indaih lohna a nasa a, hei bakah hian licensed surveyor kan buaipui mek. Surveyor zir chhuakte tan thawh tur a tam. Department pahnihte'n convergence kan kalpui thei tur hi a lawmawm," a ti.

Department pahnihte hmalaknain hman tlaka surveyor zir chhuak ṭhalaite tan ram chhung leh pawnah eizawnna/employment tam zawk hnathawh tur a inhawn zau zel dawn thu LRS Minister chuan a sawi.

Lalnghinglova Hmar chuan, "ITI, Aizawla surveyor course hi ka thawhpuite nen uluk taka kan zir hnuah tihchangtlun a ṭulzia kan hria a, chumi atan chuan LRS department-te phungbawmah kan sawm. Kan rawtnate ngai pawimawha sawihona buatsaih a ni hi a lawmawm a, department pahnihte'n ṭhalaite tana thiamna tak tak pek kawngah kan thawhhona tur hi thil pawimawh tak a ni," a ti.

Ṭhutkhawmnaah hian ITI aṭanga survey zir chhuakte'n thiamna ṭha zawk an neih theih nan te, hemi kawnga LRS-a surveyor leh technical officer-te thiamna hman ṭangkai dan te, ITI aṭanga zir chhuakte'n practical training ṭha zawk leh apprenticeship an neih theih nante leh, LRS department surveyor-te'n refresher course-te an kal theihna tur atana thawhho dan turte sawiho a ni.

Meeting-a an thil relte hrual mûma memorandum of understanding (MoU) ziah vat a nih theih nan MoU Drafting Committee an din nghal bawk.