ASF lêng mek thunun dan tur sawiho

Khawzawl dawrhsap K Vanlalṭhiana hoin nimin khan sorkar hotute leh khawtlang hruaitute'n Khawzawla vawk hri, African Swine Fever lêng meka hmalak dan tur an rêl a; Khawzawl District Veterinary Office-in vawk hri kai leh kai loh endikna (test kit) an neih tlem avangin vawkte endik chak theih a nih loh thu an tarlang.

Khawzawl DC chuan, ASF a lên mek avangin VC-te chu an theih ang tâwka fimkhurna turte mipui zirtir turin a chah a; "Mizoram sorkarin kum 2024-ah ASF hi State Specific Disaster-ah a puang a, Khawzawl district-a kum 2024 chhunga vawk thi ṭanpuina dilsakte zingah chhungkaw 205-in ṭanpuina Rs 1,56,800 an dawng tawh," a ti a, ṭanpuina la dawng lo chhungkaw panga hnenah pawisa dawn belh a nih veleh pek a nih tur thu a sawi.

Ṭhutkawmah hian, tun dinhmunah Khawzawl DVO-in test kit an neih tam loh avangin vawk endik zung zung a harsat thu leh a theih ang anga hmalak a nih mek thu tarlan a ni.

Vawk thi neite zingah registration ti lo an tam thu leh VC-te chu vawk nei zawng zawngte registration ti tura hriattir tura chah an ni. ASF chungchang inkaihhruaina (Standard Operating Procedure) inhrilhfiah a ni a, zawhna leh chhanna hun hman a ni bawk.

Animal Husbandry & Veterinary (AH&Vety) depart-ment chhinchhiah danin, kuminah nimin thleng khan Lunglei, Siaha, Lawngtlai, Mamit leh Khawzawl district-ahte ASF hri lênna khua/veng 81 a awm tawh a; hri vanga vawk thi 5,326 leh vawk suat 1,781 a awm tawh a ni.