LMC-in Police-ah Rs 5,41,075 hlân

Lunglei Municipal Council (LMC) chuan kum 2024-25 chhunga Lunglei khawpuia lirthei hûn man (parking fee) an khawn Rs 18,31,349 aṭanga Rs 5,41,075 chu Lunglei District Police hnenah an hlan a; Lungleia lirthei leh mipui chêt velna (traffic) him leh felfai zawk a awm theih nan kawngpui leh a velte thuam ṭhatna atana tih a ni.

Sorkar thuchhuah tarlan danin, LMC hian kum 2024-25 chhung khan parking fee aṭangin Rs 18,31,349 an hmu a, chungte chu Board of Councillors (BoC) chuan traffic kaihhnawih thil hrang hrang tihchangtlunna atan hman turin an rêl.

Parking fee hmuh zawng zawng Rs 18,31,349 zinga Rs 5,41,075 chu Lunglei Police hnenah an hlan a; parking fee aṭang hian traffic kaihhnawih leh kawngpui chhinchhiahna (marking) siam nan Rs 4,86,275 hman a lo ni tawh bawk.

LMC chairman Lalzuithanga chuan nimin khan a pisaah Rs 5,41,075 chu Lunglei SP J Lalmuankima hnenah a hlan a; LMC-in faina leh thianghlimna (sanitation) te, lirthei tlân dan leh hûn dan ruahmanna (traffic management) a ngaih pawimawh thu leh hma a lak chhoh mek thu a sawi.

Lalzuithanga chuan, lirthei chêt velna kaihhnawih thil ṭulte ruahman turin LMC hnuaiah Traffic & Transport Coordination Committee (TTCC) din a nih thu sawiin, "A taka hma latu LMC leh TTCC kutke ber leh an rin chhan ber chu police-te an ni," a ti a; LMC hmalaknate ṭawiawma leh thawhpui zel turin Lunglei police-te a sáwm.

J Lalmuankima pawhin Lunglei khawpuia kawngpuite chu lirthei leh mipui veivâk tana him, tlan leh hmuh nuam taka chei zel an tum thu a sawi a, "Lirthei hûn dan leh tlân danah te, kawngpuia dan leh hrai zawm chungchangahte pawh khauh zawka hmalak zel kan tum," a ti.

LMC-in Police hnena sum a pek hi kawngpui cheina leh tilang fiahtu êng (reflector/road stud light) vuahna atan te, kawng kual laia darthalang (convex mirror) dahna atan te, chhinchhiahna hrang hrang siamna atan leh, tiang êng thei (light stick), kawng danna chi hrang hrang (barricade, tape, cone, sign post, etc.), lirthei ke chehna (wheel clamp) leh hmanraw mamawh dangte leina tura ruahman a ni.

Parking fee aṭanga pawisa hmuh aṭangin tui luankawr khuhna ṭha lo siam te, kawng leh kawng sir kea kalna daidanna pal (railing) rawng hnawih te, kawngpui luan chin baka lung phah leh hna ṭul dangte pawh thawh chhunzawm zel tum a ni bawk.