Hmeichhe pawlte tana ruihhlo do Inzirtirna khârna hun hman a ni

Social Welfare minister Lalrinpuii chuan nimin khan IPR Lianchhiari Rûnah Mizoram Social Defence and Rehabilitation Board leh Working Committee on Ruihhlo Do buatsaih ‘Master Trainers’ Training on Drug Abuse Prevention for Women Church Leaders and Women Federations in Mizoram’ khârna a hmanpui.

Lalrinpuii chuan, ruihhlo leh a kaihhnawih hrang hrangin Mizoram a rùn mekah hmeichhiate an pawimawh thu sawiin, "Ruihhlo do hi sorkarin policy-a a neih avangin he lamah hian ke kan pên nasa dawn. Kan ram hi chhan tlak a la awm avangin ruihhlo chungchang inzirtirna leh ti chhin lo tura inven dan inzirtir tam a pawimawh," a ti a, kal khawmte chu an thil zirte ṭangkai taka hmang turin a ngen.

Ni hnih awh training-ah hian kohhran leh hmeichhe pawl hrang hrang - Mara Chano Py (MCHP), Seventh Day Adventist, UPC North East India leh Mizoram, MHIP, Evangelical Church of Maraland, Central Kohhran Hmeichhia, Mizoram Baptist Kohhran Hmeichhe Pawl, Salvation Army leh Lai Women Association aiawhte an tel a; an pawl hmalakna te, harsatna an tawhte leh an hmachhawpte an tarlang.

Training khârna inkhawm hi Social Welfare director Dr Lalhriatzuali Ralte-in a kaihruai a; pawl aiawhte hnenah hian ruihhlo donaa an hmalakna puih nan inkaihhruaina bu leh pawisa hlan a ni.