MSU-in UG topper-te lawmpuina an hlân

Mizo Students' Union (MSU) General Headquarters chuan nimin khan Vanapa Hall-ah Mizoram University under graduate exam 2025-a subject topper zinga Mizo 24-te hnenah lawmpuina an hlan.

Lawmpuina inkhawm hi MSU general secretary Zodinsanga'n a kaihruai a; minister Lalthansanga khuallian niin, Mizoram Cooperative Apex Bank chairman Lalnunsanga khualzahawm a ni. Topper-te hnenah hian lawmpuina thuchei leh pawisa hlan a ni a, MSU adviser Lalhmachhuana Zofa hnenah honorary doctoral degree a dawn avangin lawmpuina an hlan bawk.

Minister Lalthansanga chuan, khawvel mipuite chu global village-ah an inhlâwm khawm tawh thu sawiin, ram changkang zawkte tih dan entawn a awlsam tawh thu a sawi a, chutiang karah chuan Mizo hnam nunphung kalsan lo turin zirlaite a fuih. "Hlawhtling tak tak turin tei rei peih a pawimawh a, minister dinhmun thleng tur hian kum 1993 aṭangin ka bei tawh a, teireina hian a tawpah hlawhtlinna a chantir ṭhin," a ti.

MCAB chairman Lalnunsanga chuan, zirlaite fuih phûrna leh tihhmasawnna tura MSU-in lawmpuina an buatsaih chu ṭha a tih thu a sawi a; ram leh hnam tana ro tling ṭhalai ni turin zirlaite a fuih.

MSU president B Lalkhawngaihzuala pawhin thu sawiin, ram leh hnam hmangaih lo officer leh politician te chu ram leh hnam tan an hnawksak thu sawiin, ram leh hnam hmangaih turin zirlaite a chah a; zir thiamnain aia upa zahna leh Zo nun ze mawite hliahkhuh lo se a duh thu a sawi bawk.